Aqtaýda 2076 jyly ashylýy tıis amanat hat eskertkish tastyń ishine salyndy
Eskertkish tas Sh. Esenov atyndaǵy joǵary oqý orynnyń bolashaq ınjenerler men tehnologterge, IT mamandaryna ǵylymı tehnıkanyń túrli salalarynan bilim beretin, tehnıkalyq oılaýdy damytatyn Yessonov Technopark kesheni aýmaǵynda ornalasqan. Ýaqyt kapsýlasyn oblys ákimi Nurlan Noǵaev, ǵylym jáne joǵary bilim mınıstri Saıasat Nurbek pen ýnıversıtet prezıdenti Berik Ahmetov saldy. Sharaǵa elimizdiń 40-tan astam joǵary oqý ornynyń basshylary qatysty. Kapsýla ishindegi bolashaqqa jazylǵan amanat hat 2076 jyly – Esenov ýnıversıtetiniń 100 jyldyq mereıtoıynda ashylady dep josparlanǵan.
Aıta ketsek, Memleket basshysynyń ınnovatsııalyq ekojúıe qurý týraly ıdeıasy aıasynda ashylǵan keshendegi zerthanalar stýdentter men ónertapqysh qala turǵyndary úshin árdaıym ashyq bolady. Tehnopark MVP (Minimum Viable Product) aǵashtan, metaldan prototıp jasaýǵa múmkindik beretin orynǵa aınalmaq.
Sondaı-aq, stýdenttik saıabaq aýmaǵynda alǵashqy kóshetter otyrǵyzyldy. Saıabaqtyń jer telimi – 3,12 ga. Kógaldandyr men abattandyrý alańy – 13176,69 sharshy metr.
«Meniń stýdenttik jyldarym Qazaq ulttyq ýnıversıtetiniń qalashyǵynda ótti. Keıin oqýymdy jalǵastyryp, biliktilikti arttyrý maqsatymen jáne jumys babymen Okford, Kembrıdj, Garvard, t.b. ýnıversıtetterdiń kampýstaryn kórgende, «Shirkin, osyndaı qala ishindegi qalashyqtar bizdiń elimizdiń ár ýnıversıtetinde bolsa ǵoı» dep qııaldaıtynmyn. Stýdentterimiz aýnap-qýnap, otyra qalyp kitap oqyp, jata qalyp jazýyn jazatyn jaǵdaı jasasaq deımiz.
«Kazgýgradty» salǵan akademık Ómirbek Joldasbekovtiń iskerlik jolyn úlgi qylamyn. Ózime deıingi aldyńǵy býyn aǵa áriptesterimniń ıgi bastamasyn damyta jalǵastyrǵym keledi.
Bizdiń kóp maqsatymyzdyń biri – ýnıversıtet aýmaǵynda tek jazda ǵana emes, únemi tabıǵat aıasynda demalýǵa jáne serýendeýge arnap abattandyrylǵan saıabaq salý.
Memleket basshysy Qasym-Jomart Toqaev: «Elimizde 2025 jylǵa deıin eki mıllıard aǵash otyrǵyzýdy kózdeıtin aýqymdy joba bastaldy. Byltyr 282 mıllıon túp aǵash otyrǵyzyldy. Bıyl taǵy 410 mıllıon aǵash otyrǵyzý josparlanyp otyr», - degen bolatyn. Osy bastamaǵa biz de úles qosyp, búgin eldiń ıgi jaqsylarymen birge bolashaq saıabaǵymyzdyń alǵashqy taldaryn otyrǵyzdyq.
Jyldar óter, urpaq almasar. Al keleshekke bizden saýapty isimiz ben izimiz qalsa deımiz.
Jeriniń tas qabaty qalyń, sý tapshylyǵy eń joǵary ólke Mańǵystaýda tal egý – basqa aımaqtarda baq ósirýden kem emes sharýa, al bul jaqta saıabaq salý – ózge óńirlerde orman ósirýden kem emes», - deıdi ýnıversıtet prezıdenti Berik Ahmetov.