Aqtaýda 200 úlesker zańsyz qurylysqa aqsha salyp, aldanyp qaldy

AQTAÝ. QazAqparat - Aqtaýda zańsyz qurylysty anyqtaý boıynsha monıtorıng jumystary bastaldy, dep habarlaıdy QazAqparat tilshisi.

Oblystyq qoǵamdyq kommýnıkatsııa ortalyǵynda ótken brıfıngte Aqtaý qalasynyń ákimi Nurdáýlet Qılybaı zańsyz salynyp jatqan qurylysqa aqsha salyp aldanǵan 200 úleskerdiń máselesine qatysty pikir bildirdi.

Onyń aıtýynsha, Aqtaý qalasynyń aýmaǵynda ruqsat qujattary rásimdelmeı, qurylysy bastalǵan kópqabatty turǵyn úıler bar.

Az ýaqyttyń ishinde úsh birdeı turǵyn úı kesheniniń qurylysty ruqsatsyz júrgizgeni anyqtaldy. «Gaýhartas» jáne «Mahabbat» keshenderi jobaǵa sáıkes kelmeıdi.

Bireýi - keńse ǵımaratynyń, endi biri - avtoturaq ornyna turǵyn úı salǵan. Onymen qosa úleskerlerdi tartyp, júzdegen adamnan aldyn ala qarjy jınap alǵan.

Bir kompanııa tipti bir páterdi birneshe adamǵa satqan eken. Qazir merdiger kompanııalarǵa aldanǵandar ne baspana joq, ne aqsha joq, san soǵyp qalyp otyr. Zań talaptaryn oryndamaǵan jaýapsyz kompanııalar ústinen aryz túsirilmek.

Aqtaý qalasynyń ákimi úleskerlerge qurylysy bitpegen úılerge aqsha salmaýdy, onyń zańdy, zańsyz salynyp jatqanyn aldyn ala ákimdikten anyqtap alýdy eskertti.

«Aqtaý qalasynda ókinishke oraı zańsyz túrde qurylysy júrip jatqan birneshe úı bar. Turǵyndardyń aqshasyn alyp úıdi salyp bitire almaı jatyr. Qarjy salǵan azamattar aryz jazýlary kerek. Keıin quqyq qorǵaý organdary qurylys salyp jatqan mekemeniń basshylaryn tekseredi. Sodan keıin tıisti sharalardy qabyldaıtyn bolady. Bizder ákimshilik tarapynan beı-jaı qalmaımyz. Bul másele qazir tikeleı oblys ákiminiń qaraýynda tur. Aldaǵy ýaqytta zańsyz qurylys júrip jatsa, olardy toqtatamyz. Bul jerde qurylys mekmelemelerimen ǵana emes, jarnama beretin mekemelermen jumys júrgizilip jatyr. Eger zańsyz qurylys bolsa, olarǵa jarnama berilmesin degen tapsyrma bar», - dedi qala ákim N. Qılybaı.

Aqtaý qalalyq sáýlet jáne qala qurylysy bólimi qala aýmaǵynda salynyp jatqan qurylys nysandaryna turaqty monıtorıng júrgizedi.

Tıisti ruqsat qujattaryn rásimdemeı qurylys-montajdaý jumystary boıynsha Mańǵystaý oblysynyń qala qurylysy jáne jerdi baqylaý basqarmasy 2018 jyly – 66 ákimshilik is qozǵap, aıyppul salǵan.

2019 jyly – 130 ákimshilik is qozǵalyp, aıyppul salyndy, 2020 jyly – 30 nysanǵa qatysty tekserý jumystaryn júrgizýge hat joldandy.