Aqtaýda 15 eski úı súriledi
Aqtaýda eski úılerdi buzý jáne jańartý boıynsha jumystar 2016 jyldan beri júrgizilip kele jatyr. Osy arqyly apatty jaǵdaıdaǵy turǵyn úıler máselesi kezeń-kezeńimen sheshilip jatyr.
Alǵashqy kezeńde ıaǵnı 2016-2022 jyldar aralyǵynda 15 eski úı (2 qabatty) súrilip, 7 turǵyn úı (besqabatty) qurylysy júrgizildi. Bul arqyly 3 sh/a-da ornalasqan eski úılerdiń turǵyndary 257 pátermen qamtamasyz etildi.
«Atalǵan joba ári qaraı jalǵasyp jatyr. 2022 jyly bastalǵan jumys 3 kezeń boıynsha júzege asyrylady. Bul arqyly apatty úıler máselesi sheshilip, turǵyndardyń qaýipsizdigi qamtamasyz etiledi», - deıdi Aqtaý qalasy ákiminiń orynbasary Imammahmýt Shagırbaev.
Atap aıtsaq, eski úılerdi súrý jáne jańartý jumystary 2026 deıin jalǵasady. Bul aralyqta 590 páterli 9 turǵyn úı salynady dep josparlanýda. Sonyń arqasynda 15 eski úı buzylyp, 176 páterdiń turǵyndary jańadan salynǵan úıge kóshiriledi.