Aqtaýda 11 jasar qyzdyń basyna fýtbol qaqpasy qulap, aýyr jaraqat aldy

<p>AQTAÝ. KAZINFORM &ndash; Oqıǵa 2-shaǵyn aýdan 71-úıdiń janyndaǵy fýtbol alańynda bolǵan. Zardap shekken 11 jasap qyzdyń ájesi Tamara Bóltekovanyń aıtýynsha, alańda jóndeý jumystary júrgizilip, temir qorshaýlar ár jerde qalǵan. Nemeresiniń basyna bekitýsiz turǵan fýtbol qaqpasy qulaǵan.</p>

– Dál úıimniń aldyndaǵy alań ǵoı. Ol jerde 3-4 jastaǵy balalar, sportshylar, stýdentter júredi. Qazannyń 21inen bastap ol jerdi buza bastady. Qorshaýlaryn buzyp, ár jerge qaldyryp ketti. Negizi qaqpa bos turǵan eken. Nemerem apasymen birge oınap shyqqan edi, sol qaqpa týra bizdiń qyzdyń basyna túsip, osyndaı jaǵdaıǵa dýshar boldyq, - deıdi Tamara Bóltekova.

Jetkinshek dárigerlerdiń arqasynda aman qalǵan. Alaıda betiniń teń jartysyn tigýge týra keldi. Dárigerler Anelge jarty jyldaı kútim men plastıkalyq operatsııa jasaý kerektigin aıtqan.

Foto: Aıagóz Іzbasarova

– Oqıǵa qazannyń 24i kúni boldy. Merdiger mekemeniń basshysy tek búgin habarlasty. Bárine kómektesemiz, plastıkalyq otaǵa da dep qońyraý shaldy, - deıdi qyzdyń ájesi. 

Foto: Aıagóz Іzbasarova

Dárigerler naýqastyń jaǵdaıy turaqty aýyr ekenin jetkizdi. 

– Túskendegi dıagnozy jabyq bas mı jaraqaty. Mańdaı súıeginiń lınııalyq synyǵy. Bas mıynyń soǵylýy ortasha aýyrlyqta. Mańdaı aımaǵynyń kesilgen jaraqaty, kóz almasynyń soǵylýy. Qazirgi tańda balanyń jaǵdaıy ortasha aýyrlyqta, - deıdi Mańǵystaý oblystyq balalar aýrýhanasynyń neırohırýrg dárigeri Erbol Kenjevalov. 

Mańǵystaý oblystyq polıtsııa departamentiniń habarlaýynsha, osy oqıǵaǵa qatysty sapasyz qurylys deregi boıynsha sotqa deıingi tergeý bastalǵan. Qazirgi ýaqytta qajetti tergeý áreketteri júrgizilip jatyr.