Aqtaýda 1 qyrkúıekte smart-mektep óz jumysyn bastaıdy
Konferentsııaǵa QR BǴM bilim salasyn baqylaý komıteti tóraǵasynyń orynbasary L.Bólebaeva, «NZM» DBBU ókilderi, aýdandyq, qalalyq bilim bólimderiniń basshylary jáne ustazdar qaýymy qatysty.
Oblysta 271 mektepke deıingi uıym, 143 mektep, 15 qosymsha bilim berý uıymy jumys isteıdi. Oblysta jyl saıyn orta eseppen 20-23 balabaqsha ashylyp, 3-6 jastaǵy balanyń 93% mektepke deıingi tárbıemen qamtyldy. Jyl sońyna deıin qamtý kórsetkishi 97% bolady. 1 qyrkúıekte 134 129 oqýshy mektepke barady, onyń ishinde birinshi synyp oqýshylarynyń kontıngenti 16600 oqýshyny quraıdy. Jańa oqý jylynda balalarǵa 143 memlekettik jáne 5 jekemenshik mektep bilim beredi. Bıyl oblysta 9 mektep ashyldy.
Aqtaý qalasyndaǵy jańadan ashylǵan № 29 smart-mektebinde STEM-laboratorııa, smart-jylyjaı, galografıkalyq aqparattandyrý buryshtary, chıp arqyly oqýshylardyń mektepke kelip-ketýin qadaǵalaý jobalary engizildi. Osyndaı STEM-laboratorııa memlekettik-jeke menshik mehanızmi arqyly oblystaǵy 25 mektepte jumys jasaıdy. Mańǵystaý polıtehnıkalyq kolledjinde IT mamandar, ınformatıka páni muǵalimderi men oqýshylary úshin biliktilik arttyrý kýrstary ótkiziletin ІT-ortalyq ashylady.
«Aýyl kóshbasshylary» jobasynyń nátıjesi boıynsha 30 oqýshy Almaty qalasyndaǵy jáne 70 oqýshy Aqtaý qalasynda teńiz jaǵasyndaǵy trenıngtik lagerde oqyp, demalyp qaıtty.
«Kásipker bolamyn» jobasy aıasynda 85 muǵalim, 365 oqýshy bıznes-trenerlikti oqyp, nátıjesinde jeńimpaz 150 bala teńiz jaǵalaýyndaǵy bıznes-lagerde elimizge tanymal kásipkerler jáne bıznes-trenerlerden dáris aldy. Oqýshylar men stýdentter arasynda bilim basqarmasy men Nazarbaev Zııatkerlik mektebi birigip ótkizgen «Kaspıan Startap-2018», Esenov ýnıversıtetiniń «Startap Bolashaq» konkýrstarynyń nátıjesinde 28 joba qarjylandyrylyp, kásipkerler tarapynan qoldaý taýyp, osyndaı startap jobalardyń konkýrsyn jyl saıyn ótkizý josparlandy. Atap aıtsaq, byltyr bastalǵan «Jasyl mektebim - jasyl mekenim» jobasy aıasynda bilim berý uıymdarynda 25 jylyjaı ashyldy.
Aqtaý qalasyndaǵy №21 mekteptiń janynan eýropalyq standartqa sáıkes fýtbol alańy (46 mln) salynyp, «Namys» balalar fýtbol klýby quryldy. Qazir klýbta eki júzden asa jasóspirim bar. Mektep bazasynan fýtbol akademııasyn ashý jumystary júrgizilýde. Qyrkúıek aıynan bastap jergilikti bıýdjet esebinen 22 balany qamtıtyn fýtbol synyby ashylady.
«Jastardy ǵylymı-zertteý jumystaryna baýlý jáne óndiristik-tehnologııalyq ortaǵa kiristirý - basty mindetterimizdiń biri bolýy tıis. «Tsıfrlyq Qazaqstan» memlekettik baǵdarlamasyn, onyń ishinde bilim berý júıesin tsıfrlandyrýdy, sonymen qatar IT jáne ınjınırıngtik qyzmet daǵdylaryn damytýdy júzege asyrý qajet. Bilim berý uıymdaryndaǵy ınternettiń jyldamdyǵyn 4-10 MBıtten 60-100 Mbıtke deıin kóterý, ony saýatty ári tolyqqandy paıdalaný talap etiledi. Synyptardy zamanaýı úlgidegi kompıýterlermen, LED dıspleılermen jabdyqtaý, robotehnıka quraldarynyń jańa modelderimen tolyqtyrý qajet. Osy maqsatta bıyl jergilikti bıýdjetten kompıýter satyp alýǵa 300 mln. teńge qaraldy. Bilim berý júıesin damytýǵa, týǵan jerdiń shynaıy otansúıgishterin tárbıeleýge qosqan úlesterińiz úshin zor alǵysymdy bildire otyryp, jańa oqý jylynyń bastalýymen quttyqtaımyn» - dedi oblys ákimi Eraly Toǵjanov.