Aqtaý turǵyny esirtkini saqtaǵany jáne taratqany úshin 10 jylǵa bas bostandyǵynan aıyryldy

AQTAÝ. QazAqparat - Aqtaý turǵyny esirtkini asa iri mólsherde zańsyz saqtaǵany jáne ótkizgeni úshin 10 jylǵa sottaldy, dep habarlaıdy QazAqparat Polisia.kz-ke silteme jasap.

Ótken jyldyń jeltoqsan aıynda Mańǵystaý oblysy polıtsııa departamenti esirtki qylmysyna qarsy is-qımyl basqarmasynyń qyzmetkerleri sıntetıkalyq esirtki jasyrýmen aınalysqan er adamdy ustady. Ol Telegram arqyly belgisiz adamnan sıntetıkanyń daıyn partııalarynyń koordınattaryn alyp otyrǵan.

Ustalǵan adam ýaqytsha turǵan páterde júrgizilgen tintý kezinde asa iri mólsherdegi sıntetıkalyq esirtki tabylyp, tárkilendi.

Er adamnyń aıtýynsha, ol Telegram messendjeri arqyly jeli paıdalanýshysymen baılanysqan. Ustalǵan kúdikti jumysyn sol jerden tapqan. Sot-saraptamalyq zertteýdiń qorytyndysy boıynsha tárkilengen zattar sıntetıkalyq esirtki alfa-PvP (jyldamdyq) jáne mefedron bolyp shyqty. Jalpy salmaǵy shamamen 940 grammdy qurady.

Aımaqtyń qylmystyq ister jónindegi mamandandyrylǵan aýdanaralyq soty kúdiktini Qylmystyq kodekstiń 297-babynda kózdelgen qylmystyq quqyq buzýshylyq boıynsha kináli dep tanyp, 10 jylǵa bas bostandyǵynan aıyrý jazasyn taǵaıyndady.