Aqtaý turǵyny balalarǵa tıisti degen kúdikke ilindi

ASTANA. QazAqparat - Áleýmettik jelide adamdardyń aıtýynsha, balalarǵa tıisken er adamdy ustaý sáti túsirilgen foto tarady, dep habarlaıdy QazAqparat inAktau.kz caıtyna silteme jasap.

Jaǵdaıdy anyqtaý úshin oqıǵa ornyna polıtsııa keldi.

Mańǵystaý oblysynyń polıtsııa departamentinde túsindirgendeı, oqıǵa 31 shildede bolǵan. Saǵat 00:25-te polıtsııa bólimine 26-shy shaǵynaýdan turǵyndary kishkentaı balalardyń artynan júgirip júrgen er adamdy ustady degen habarlama tústi.
«Oqıǵa ornyna patrýldik polıtsııa batalonynyń qyzmetkerleri bardy. Tekserý barysynda 43 jastaǵy er adam balalardyń artynan júgirgeni emes, túnde tynyshtyqty buzyp, adamdardy mazalaǵany anyqtaldy. Atalǵan fakti boıynsha QR ÁQBtK 437-babynyń 2-bóligi (Tynyshtyqty buzý) boıynsha ákimshilik hattama toltyryldy», - dep túsindirdi vedomstvodan.
Polıtsııada tártip buzýshyǵa fızıkalyq kúsh jumsalmaǵanyn túsindirdi.
Baptyń bul bólimi jeke tulǵalarǵa 10 AEK (34 500 teńge) mólsherinde aıyppul salýdy kózdeıdi.
Buǵan deıin jeli qoldanýshylary bir-birine beınejazba taratqan. Onda bir áıel 26-shy shaǵynaýdanda júrgen er adamnyń balalarǵa tıisip, betterinen súıip, qoldarynan ustap alǵanyn aıtqan.
Polıtsııa bul oqıǵa 28a shaǵynaýdanda bolǵanyn habarlady. 47 jastaǵy er adam ustaldy. Oǵan qatysty QR ÁQBtK 440-babynyń 3-bóligi jáne 449-bóligi boıynsha ákimshilik hattama toltyryldy.