Aqtaý teńiz saýda portynan konteınerlik júk tasymaldaıtyn Suńqar kemesi jolǵa shyqty

AQTAÝ.QazAqparat - Aqtaý teńiz saýda portynan qazaqstandyq konteınerlik júk tasymaldaıtyn ekinshi keme - «Suńqar» alǵash ret jolǵa shyqty. Bul týraly oblystyq jolaýshylar kóligi jáne avtomobıl joldary basqarmasynyń baspasóz qyzmeti málim etti, dep habarlaıdy QazAqparat tilshisi.

3 qyrkúıek kúni shyqqan «Suńqardyń» alǵashqy baǵyty - Ázerbaıjan Respýblıkasy, Baký qalasynyń «Alıat» porty. «Suńqar» - «Qazaqteńizkólikfloty» ulttyq teńiz keme qatynasy kompanııasyna tıesili mamandandyrylǵan flot qataryndaǵy keme.

Transkaspıı halyqaralyq kólik marshrýtyndaǵy jáne jalpy álemdegi konteınerlik tasymaldarǵa degen qajettilik pen suranystyń joǵary bolýyna baılanysty keme qaıta jasaqtalyp, konteıner tasymaldaıtyn keme retinde modernızatsııalanǵan.

«Suńqar» kemesiniń konteınerlik keme retinde alǵash jolǵa shyǵýyn «Qazaqteńizkólikfloty» saltanatty túrde atap ótti. Mereıli sharaǵa «Qazaqstan temir joly» AQ ókilderi, Qazaqstandaǵy «Transkaspıı halyqaralyq kólik baǵdary» halyqaralyq qaýymdastyǵynyń bas hatshysy, Qazaqstan Respýblıkasy porttarynyń teńiz ákimshiligi, Mańǵystaý oblysy ákimdiginiń ókilderi qatysty. Olar «Suńqar» kemesiniń kapıtanyna aq jol tilep, shyǵaryp saldy», - delingen málimette.