Aqtaý teńiz-saýda porty EQYU-nyń «Jasyl port» sertıfıkatyn aldy

AQTAÝ. QazAqparat – «Aqtaý teńiz saýda porty» Eýropadaǵy qaýipsizdik jáne yntymaqtastyq uıymynyń (EQYU) «EcoPorts Pers» sertıfıkatyn aldy, dep habarlaıdy QazAqparat tilshisi óńirlik kommýnıkatsııalar ortalyǵyna silteme jasap.

«Porttardyń ekologııalyq saraptama júıesindegi» jasyl port sertıfıkaty bizdiń halyqaralyq jáne eýropalyq deńgeıde jumys jasaı alatynymyzdy kórsetedi. Aqtaý saýda porty ekologııalyq, jumys protsesi barysyndaǵy qaýipsizdik standarttaryna tolyq jaýap beredi. Bul óz kezeginde bizdiń tutynýshylar aldynda barlyq talaptarǵa sáıkes keletin, joǵary sapaly qyzmet kórsetetin port ekenimizdi bildiredi», - dedi Aqtaý halyqaralyq teńiz saýda portynyń tóraǵasy Abaı Túrkpenbaev.

Halyqaralyq sertıfıkatty tabystaý sharasyna EQYU-nyń Eýropadan kelgen delegatsııasy men osy uıymnyń energetıkalyq qaýipsizdik salasyndaǵy baǵdarlamalar jónindegi aǵa qyzmetkeri Denıel Kross, EQYU hatshylyǵy, Mańǵystaý oblysy ákiminiń birinshi orynbasary Bekbol Orynbasarov qatysty.

Qatysýshylar Aqtaý portynyń aldaǵy ýaqytta Eýrazııanyń logıstıkalyq jáne saýda ortalyǵyna aınalýǵa múmkindik ashqanyn, iri porttarmen yntymaqtasýǵa bolatynyn atap ótti.