Aqtaý teńiz portyna ınspektsııalyq-tekserý kesheni ornatylady

ASTANA. QazAqparat – «Qazaqstan Temir Joly» ulttyq kompanııasy «Aqtaý teńiz portyna» ınspektsııalyq-tekserý keshenin ornatý máselesin pysyqtap jatyr. Premer-Mınıstr Álıhan Smaıylov Senat depýtatynyń saýalyna joldaǵan jaýabynda osnydaı málimet aıtylǵan, dep habarlaıdy QazAqparat tilshisi.

«Qazaqstan Temir Joly» ulttyq kompanııasy» AQ «Aqtaý teńiz porty» ótkizý pýnktin statsıonarlyq ınspektsııalyq-tekserý keshenimen jabdyqtaý máselesin pysyqtaýda», - dep jazady Álıhan Smaıylov.

Onyń aıtýynsha, Eýrazııalyq ekonomıkalyq odaqtyń syrtqy shekarasynyń qazaqstanǵa tıesili bóliginde turǵan ótkizý pýnktterin ozyq halyqaralyq standarttar men talaptarǵa sáıkes jabdyqtaý birneshe máseleni sheshýge múmkindik ashpaq. Olar:

- kólik ótkizý pýnktterindegi kedendik operatsııalardyń ýaqytyn 30 mınýtqa deıin qysqartyp, ótkizý qabiletin 5 eseden astam ulǵaıtý (táýligine 150-den 800-ge deıin);

- derekterdi baqylaý, baılanystyrý, berý jáne almasýdyń zamanaýı tehnologııalaryn engizý;

- ótkizý pýnktterin jeke tulǵalardy, bagajdy, taýarlar men kólik quraldaryn baqylaýdy júzege asyratyn jańa jabdyqtarmen jaraqtandyrý;

- biryńǵaı ótpeli avtomattandyrylǵan tehnıkalyq baqylaý dálizderin paıdalaný arqyly keden protsesteriniń ashyqtyǵyn jáne avtomattandyrylýyn qamtamasyz etý.