«Aqtaý teńiz porty» arnaıy ekonomıkalyq aımaǵyna qansha ınvestıtsııa tartylǵan
Joǵary palata depýtattary arnaıy ekonomıkalyq aımaqtardyń qyzmetin jetildirý tetikterin zerdeleý maqsatynda Mańǵystaýdaǵy birqatar nysandy aralady. Senatorlar elimizdegi qolaıly ınvestıtsııalyq ahýaldy damytýǵa jáne eksportqa baǵdarlanǵan jobalardy iske asyrý úshin otandyq jáne sheteldik ınvestıtsııa tartýǵa baǵyttalǵan «Aqtaý teńiz porty» AEA-ǵa arnaıy bardy. Olar premıým klasty gaz germetıkalyq burandaly qosylymy bar qubyrlardy shyǵarý kásipornynyń jumysymen, sorǵy shtangalary men mýftalar óndirý zaýytymen, jumsaq oraýysh ydystar - úlken bagtar óndirý zaýytynyń jumysymen tanysty. Sondaı-aq Senat depýtattary jol bıtýmyn óndiretin kásiporyn, «Quryq porty» men «Aqtaý teńiz saýda portyna» da aıaldady.
«Bizdiń munda kelýimizdiń maqsaty – arnaıy ekonomıkalyq aımaq qyzmetimen tanysý, qurylystyń aıaqtalmaýy jáne ınfraqurylymdy júrgizý, óńdeý ónerkásibine jeke ınvestıtsııalardy tartý deńgeıi boıynsha máselelerdi talqylaý, sondaı-aq arnaıy ekonomıkalyq aımaqtarda qoldanystaǵy jáne iske asyrylyp jatqan jobalardy qarastyrý», dedi komıtet tóraǵasy Serikbaı Trumov.
Mańǵystaý oblysyna sapardy qorytyndylaý kezinde komıtet músheleri «Arnaıy ekonomıkalyq aımaqtardyń naqty jaı-kúıi jáne jumys isteýiniń aldaǵy perspektıvalary» taqyrybynda keńeıtilgen dóńgelek ústel otyrysyn ótkizdi. Keńes barysynda «Aqtaý teńiz porty» AEA qyzmetiniń tıimdiligi, arnaıy ekonomıkalyq aımaqtardy odan ári damytý, onyń ishinde AEA qyzmetin retteıtin Qazaqstan Respýblıkasynyń zańnamalyq aktilerine enetin ózgerister máseleleri talqylandy.
«Búgingi keńeske Senat depýtattary ǵana emes, Ortalyq memlekettik organdardyń, mınıstrlikterdiń, atap aıtqanda, ulttyq ekonomıka mınıstrliginiń qyzmetkerleri de qatysty. Máseleler jan-jaqty qaraldy, onyń ishinde ekonomıkalyq jaǵynan salyq shyǵyndary zerdelendi jáne jaqyn arada bul máseleni respýblıkalyq bıýdjet komıssııasynyń qaraýyna shyǵarý josparlanyp otyr»,- dedi senator.
Jalpy búgingi tańda «Aqtaý teńiz porty» arnaıy ekonomıkalyq aımaǵyna salynǵan ınvestıtsııanyń jalpy kólemi 266,1 mlrd. teńgeni quraıdy, onyń ishinde sheteldik ınvestıtsııalar - 168,7 mlrd. teńge, 406,7 mlrd. teńgege ónim óndirildi. 1780-nen astam jumys orny qurylyp, salyq tólemderiniń somasy 54,2 mlrd. teńgege jetti.