Aqtaý-Tbılısı reısiniń jolaýshysy 30 myń dollar alyp ushpaq bolǵan

NUR-SULTAN. QazAqparat – Aqtaý halyqaralyq áýejaıynda Grýzııaǵa 30 myń dollar alyp ushpaq bolǵan jolaýshy toqtatylyp, ákimshilik hattama toltyryldy. Bul týraly Mańǵystaý oblysy boıynsha Memlekettik kirister departamenti málim etti, dep habarlaıdy QazAqparat.

«Aqtaý-Tbılısı baǵytyndaǵy halyqaralyq áýe reısiniń jolaýshylaryn kedendik baqylaý kezinde Mańǵystaý oblysy boıynsha Memlekettik kirister departamenti men QR UQK Shekara qyzmetiniń qyzmetkerleri birlesip, 30 myń AQSh dollaryn shyǵarý áreketin toqtatty», - dep málimdedi departamentten.

Prezıdenttiń «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» bıyl 14 naýryzdaǵy Jarlyǵy boıynsha 10 000 AQSh dollary balamasynan asatyn jáne áketý kúnine belgilengen QR Ulttyq Bankiniń baǵamy boıynsha eseptelgen somadaǵy qolma-qol shetel valıýtasy jáne (nemese) shetel valıýtasyndaǵy aqsha quraldaryn áketýge tyıym salynǵan.

Sondaı-aq, «QR Ulttyq Banki shyǵaratyn 5, 10, 20, 50 jáne 100 gramm affınırlengen altyn quımalaryn jáne «ALTYN BARYS» pen «KÚMIS BARYS» ınvestıtsııalyq monetalaryn, 100 gramnan astam affınırlengen altyndy áketýge de ruqsat joq.

«Osyǵan baılanysty shetelge shyǵýdy josparlaǵan azamattardan Qazaqstan Respýblıkasynyń qoldanystaǵy zańnamasyn saqtaýyn suraımyz», - deıdi keden qyzmetkerleri.

Buǵan deıin Nur-Sultannan Tashkentke baratyn ushaq jolaýshysy 9 mln teńge alyp ketpek bolǵan.