Aqtaý sammıtinde bes eldiń vedomstvolary birqatar qujattardy bekitti

ASTANA. QazAqparat - Búgin Kaspıı mańy memleketteriniń besinshi sammıtinde bes eldiń arasynda birqatar qujattarǵa qol qoıyldy, dep habarlaıdy QazAqparat.

Sonymen, Kaspıı teńizinde lańkestikpen kúres salasynda yntymaqtastyq týraly hattama bekitildi. Bul qujatqa Qazaqstan tarapynan QR Syrtqy ister mınıstri Qaırat Ábrirahmanov qol qoıdy.

Ekinshi qujatty, ıaǵnı Kaspıı teńizinde uıymdasqan qylmyspen kúres salasyndaǵy yntymaqtastyq týraly hattamany bes eldiń ishki ister mınıstrleri bekitti. 

Munymen qosa, bes eldiń ókilderi Shekaralyq vedomstvolardyń yntymaqtastyǵy men ózara is-qımyly týraly hattamaǵa qol qoıdy. 
Budan bólek, Sammıt aıasynda Kaspıı mańy memleketteriniń úkimetteri arasynda saýda-ekonomıkalyq yntymaqtastyq týraly kelisim jasaldy. 

Qol qoıylǵan kelesi kelisim Kaspıı mańy memleketteriniń úkimetteri arasyndaǵy kólik salasy boıynsha yntymaqtastyqqa arnaldy. 
Sonymen qatar, Kaspıı teńizinde janjaldardy boldyrmaý jónindegi kelisim bekitildi. Osy qujatqa Qazaqstan jaǵynan QR Qorǵanys mınıstri Nurlan Ermekbaev qol qoıdy. 

Budan buryn habarlanǵandaı, Aqtaý sammıtine qatysqan bes eldiń basshylary Kaspııdiń quqyqtyq mártebesi týraly konventsııaǵa qol qoıdy.