Aqtaý portynda Irannan ákelingen kontrabandalyq temeki tabyldy
13:18, 06 Maýsym 2019
AQTAÝ. QazAqparat - Mańǵystaý oblysy boıynsha ekonomıkalyq tergeý departamenti Iran Islam Respýblıkasynan kontrabandalyq jolmen ákelingen temeki boıynsha sotqa deıingi tergeýdi aıaqtady. Bul jóninde Qarjy mınıstrliginiń baspasóz qyzmetine silteme jasap QazAqparat habarlaıdy.
Departament qyzmetkerleri oblystyń sybaılas jemqorlyqqa qarsy qyzmetimen birlesip, Aqtaý halyqaralyq teńiz saýda portynyń aýmaǵynan 12 konteınerge tıelgen, quny 1,1 mlrd teńgeni quraıtyn zańsyz temeki taýaryn tapqan bolatyn. Bul jóninde keden organdaryna habarlanbaǵan.
«Mamandardyń esebinshe, tıisti kedendik tólemder men salyqtardyń somasy - 1,8 mlrd teńge. Qazirgi tańda qylmystyq is sotqa jiberildi» delingen habarlamada.