Aqtaý men Munaıly joldaryna «Sergek» beınebaqylaý júıesi ornatyla bastady

AQTAÝ. QazAqparat - «Tsıfrly Qazaqstan» memlekettik baǵdarlamasyn júzege asyrý aıasynda halyqtyń jol jáne qoǵamdyq qaýipsizdigin qamtamasyz etý úshin Aqtaý qalasy men Munaıly aýdanynda «Sergek» zııatkerlik beınebaqylaý júıesi ornatylady, dep habarlaıdy Mańǵystaý oblysy ákiminiń baspasóz qyzmeti.

Mańǵystaý oblysy boıynsha tsıfrlyq tehnologııalar basqarmasy osy joba aıasynda QR Іshki ister mınıstrligi Mańǵystaý oblysynyń polıtsııa departamenti jáne jeke seriktes «Sergek Projects Ltd» kompanııasymen birlesip, úshjaqty kelisimge qol qoıdy.

Joba boıynsha barlyǵy 1138 baqylaý kamerasy ornatylady.

Kameralardyń kómegimen polıtsııa qyzmetkerleri jol qozǵalysy men qoǵamdyq quqyq buzýshylyqtardy anyqtaýǵa múmkindik almaq.

Beınebaqylaý kameralaryndaǵy jazba 30 kún boıy saqtalady.

«Sergek» júıesin ornatý birinshi kezekte jol-kólik oqıǵalarynyń aldyn alýǵa jáne jol qozǵalysy erejelerin buzýdyń aldyn alýǵa baǵyttalǵan.

Aıta ketý kerek, «Sergek» qoǵamdyq jáne jol qaýipsizdiginiń zııatkerlik júıesi qazaqstandyq jasaqtaýshylardyń týyndysy.

Aqtaý qalasynda 95 núktede 380 beınebaqylaý kamerasy, Munaıly aýdanynda 35 núktede 140 beınebaqylaý kamerasy jelilik ýchaskelerge ornatylady.

Aqtaý qalasyndaǵy kóshe qıylystarynda 13 núktede 156 kamera, Munaıly aýdanynda 5 núktede 60 kamera ornatylmaq.

Sondaı-aq, Aqtaý qalasynda 402 qoǵamdyq qaýipsizdik kamerasy, 50 núktede 100 kamera, Munaıly aýdanynda 100 núktede 300 beınebaqylaý kamerasy bolmaq. Temir jol ótkelderinde de kameralar ornatylady.

Sonymen qatar, Aqtaý qalasynda arnaıy derekterdi óńdeý ortalyǵy, Munaıly aýdanynda jedel basqarýdyń shaǵyn ortalyǵy ashylmaq.

Qazirgi ýaqytta «Sergek» qoǵamdyq jáne jol qaýipsizdiginiń zııatkerlik júıesin ornatý jumystary bastaldy.

Júıeni tolyq iske qosý 2023 jyldyń sáýir aıyna josparlanǵan.

Foto: Mańǵystaý oblysy ákiminiń baspasóz qyzmeti