Aqtaý mańyndaǵy ushaq apaty: Zardap shekkenderdiń qazirgi ahýaly qandaı

<p>ASTANA. KAZINFORM &ndash; Aqtaý qalasyndaǵy áýejaı mańynda jolaýshylar ushaǵynyń apatqa ushyraýy saldarynan zardap shekken 29 adamnyń 27-si Mańǵystaý oblystyq aýrýhanasyna jetkizildi. Bul týraly Densaýlyq saqtaý mınıstrliginen habarlady.</p>

Patsıentter ártúrli jaraqattarmen, negizinen birneshe zaqymdarmen tústi, olardyń deni - mıdyń jabyq jaraqaty, mıdyń shaıqalýy, keýde qýysynyń jabyq jaraqattary, travmatıkalyq shok. 

- 26 jeltoqsan kúni tańerteń 11 patsıent reanımatsııa bólimshesinde, 13-i - travmatologııa bólimshesinde, 2-eýi - neırohırýrgııa bólimshesinde, 1-eýi – hırýrgııa bólimshesinde em aldy. 

Patsıentterdiń jaǵdaıy boıynsha: ekeýi asa aýyr jaǵdaıda, 11-i aýyr jaǵdaıda, 14-i – ortasha aýyrlyq dárejesinde, 2 patsıenttiń shaǵymy joq, qanaǵattanarlyq jaǵdaıda.

11 patsıenttiń segizi ókpeni jasandy jeldetý apparatynda jatyr jáne dárilik sedatsııa, tonıkter qabyldaýda. Kelip túsken kezde barlyq zardap shekkenderge qajetti zerttep-qaraý túrleri júrgizildi, jaǵdaıy turaqtanǵannan keıin beıini boıynsha emdeýge jatqyzyldy, - dep jazdy vedomstvodan. 

Densaýlyq saqtaý mınıstrligi zardap shekkenderge medıtsınalyq kómek tolyq kólemde kórsetiletinin atap ótti. 

Dárigerler aýyr patsıentterdiń jaǵdaıyn turaqtandyrý úshin barlyq múmkin sharalardy qabyldaýda, aýrýhana dári-dármektermen, jabdyqtarmen jetkilikti túrde qamtamasyz etilgen. 

Buǵan deıin habarlanǵandaı, Astanadan Aqtaýǵa áýe apatynan zardap shekkenderge medıtsınalyq kómek kórsetý úshin sanıtarııalyq avıatsııa ushaǵy jiberilgen. 

Bortta quramynda eki reanımatolog, 4 travmatolog, neırohırýrg jáne kombýstıolog bar QR Densaýlyq saqtaý mınıstrliginiń Ulttyq shuǵyl medıtsınany úılestirý ortalyǵynyń mobıldik brıgadasy keldi. 

Zardap shekkenderdiń jaǵdaıy jáne olardyń emdelý barysy týraly qosymsha derekter aqparat jańartylǵan saıyn usynylatyn bolady.

Reseı tarapymen kelissózderden, mamandardyń konsýltatsııalarynan keıin búgin RF Apattar medıtsınasynyń bortymen Aqtaýdan Máskeýge 9 patsıent, Reseı azamattary jiberildi.