Aqtaý, Quryq porttary arqyly ótetin júk kólemi 2,4 ese ósti – komıtet

ASTANA. QazAqparat – Kólik komıteti tóraǵasynyń orynbasary Qasym Tilepov ınvestorlarǵa Transkaspıı halyqaralyq kólik baǵytynyń áleýetin tanystyrdy, dep habarlaıdy QazAqparat tilshisi.

«Shyǵys-Batys baǵytynda Transkaspıı kólik dáliziniń Eýropa, Ortalyq Azııa jáne Qytaı arasyndaǵy tranzıttik aǵyndardy qamtamasyz etýdegi róli artty. Biz Qytaı-Qazaqstan-Ázerbaıjan-Grýzııa-Túrkııa jáne odan ári Eýropa baǵyty boıynsha Transkaspıı halyqaralyq kólik baǵytyn iske qostyq. Sondaı-aq, Qytaı, Ázerbaıjan, Grýzııa, Túrkııa, Ýkraına, Rýmynııa jáne Polsha sııaqty elderdiń temirjol, teńiz ákimshilikteri men logıstıkalyq operatorlarynyń qatysýymen Transkaspıı halyqaralyq kólik marshrýtynyń halyqaralyq qaýymdastyǵy quryldy. Bul Ortalyq Azııa, Qytaı, Kavkaz, Túrkııa jáne Eýropa arasyndaǵy júk aǵynynyń eń qysqa jolyn ashty», - dedi Qasym Tilepov Kazakhstan Global Investment Roundtable-2022 atty jahandyq ınvestıtsııa jónindegi dóńgelek ústeldiń jalpy otyrysynda.

Onyń málimeti boıynsha, Aqtaý jáne Quryq teńiz porttary arqyly júkti aýystyryp tıeý kólemi 2,4 ese ósken.

«Ósip kele jatqan júk aǵyny Qazaqstan aýmaǵynda da, búkil marshrýt boıynda da «tar ótkelder» bar ekenin kórsetti.

QR aýmaǵy boıynsha aıtsaq:

- magıstraldyq temirjol jelisiniń jekelegen ýchaskelerinde bir joldy ýchaskeler jáne elektrlendirýdiń bolmaýy;

- jyljymaly quramnyń tapshylyǵy, jeke parom flotynyń bolmaýy;

- konteıner parkiniń jetispeýi;

- port ınfraqurylymynyń jetkiliksiz damýy (krandar, rıchstakerler);

- Kaspııdiń túbin tereńdetý jumystary sııaqty qajettilikter bar ekenin kórip otyrmyz. Biz osy problemalardyń bárin zerttedik, endi olardy joıý úshin tıisti sharalar qabyldap jatyrmyz», - dedi komıtet tóraǵasynyń orynbasary.