Aqtaý konventsııasy Orta Azııa elderiniń etene aralasýyna múmkindik beredi - sarapshy

ASTANA. QazAqparat - Kaspıı teńiziniń quqyqtyq mártebesi týraly Konventsııaǵa qol qoıylýy álemdik qaýymdastyqtyń negizgi kózdegen nysany boldy. «Kaspıı bestigi» basshylarynyń kezdesýi bizdiń dáýirimizdiń mańyzdy geosaıası oqıǵalarynyń biri dep esepteıdi QR Tuńǵysh Prezıdenti kitaphanasy dırektorynyń orynbasary Gúlzat Kóbenova.

«Kaspıı mańy memleketteri basshylarynyń buǵan deıingi barlyq sammıtteri men ótip ketken Syrtqy ister mınıstrleriniń keńesi, Arnaıy jumys toptarynyń otyrystary barlyq taraptardyń túıisý núktesin izdeýge shoǵyrlanǵanyn kórsetken edi. Sondyqtan da kelissózderdiń kúrdeliligine qaramastan ózara qolaıly sheshimder konsensýsyna qol jetkizildi. Tolyqtaı alǵanda, konstrýktıvti suhbat ahýaly men joǵary senim deńgeıin atap ótken jón», - dedi ol QazAqparat tilshisine bergen suhbatynda.

Onyń aıtýynsha, nátıjesinde Konventsııa Kaspıı óńirinde oryn alyp otyrǵan máselelerdi sheshý úshin quqyqtyq tuǵyrnama quratyn biregeı qujatqa aınalyp otyr. Atap aıtqanda, jaǵalaý memleketteriniń zaıyrly jáne biregeı quqyqtarynyń shegine qatysty máseleler, teńizde júzý rejimi, Kaspıı teńizinen álemdik muhıttarǵa jáne keri baǵytta barlyq kólik quraldarynyń ený múmkinshiligi, qubyr jelisin tóseý máselesi sheshildi.

«Energııa resýrstaryn óndirý men tasymaldaýdan bastap, ekologııa men qaýipsizdik salalaryndaǵy kelisimge deıingi yntymaqtastyqtyń jańa múmkinshilikteri ashylady. Óńirlik deńgeıde bul tek qana Kaspıı mańy memleketterin ǵana emes, sonymen  birge Ortalyq Azııa elderin jaqyndastyra túsýge septigin tıgizedi. Al jahandyq deńgeıde álemdik jetekshi derjavalardyń usynystaryn qosa alǵanda Kaspıı mańy memleketteriniń damý ulttyq baǵdarlamalaryn túıindestirýge múmkindik beredi», - dedi Gúlzat Kóbenova.

Sonymen qatar ol Kaspıı mańy memleketteriniń kómirsýtekterdi, ózinde shyǵarylatyn  ónimderdi,  tranzıttik taýlarlardy eýropalyq jáne azııalyq naryqtarǵa tasymaldaýdaǵy resýrstyq-kóliktik áleýetiniń de keńeıe túsetindigin basa aıtty.

«Aqtaý sammıtinde ónerkásip, saýda, týrızm jáne ekonomıkanyń basqa da salalaryndaǵy ekonomıkalyq qarym-qatynastyń halyqaralyq-quqyqtyq bazasyn qalyptastyratyn máselelerdi qosa alǵandaǵy yntymaqtastyqtyń mańyzdy baǵyttary boıynsha birqatar qujattarǵa qol qoıylǵandyǵyn da atap ótken jón», - dedi sarapshy.