«Aqtaý-Kıev» áýe reısi ashylýy múmkin
Ýkraına elshisi Mańǵystaý oblysymen tanysýǵa jáne eki eldiń ekonomıkalyq, mádenı baılanystaryn odan ári damytý máslelerin talqylaý úshin arnaıy kelgen.
Kezdesý barysynda oblys ákimi Elshini óńirdiń áleýmettik-ekonomıkalyq damýy, ótken jyly qol jetkizilgen kórsetkishter atap aıtsaq, kólik logıstıkasy, týrızm, agroónerkásip kesheni jáne energetıka salalary boıynsha habardar etti.
S. Trumovtyń aıtýynsha, Mańǵystaý oblysy áýe, temirjol, avtomobıl jáne sý kólik jelileri shoǵyrlanǵan iri kólik-logıstıkalyq ortalyqqa aınalýda.
«Búginde aımaqtaǵy eki Kaspıı porty bir-birin tolyqtyryp tur. Bul óńir úshin jańa perspektıvalar ashady. Quryq arqyly ótetin Transkaspıı baǵyty Qytaıdan, Ortalyq Azııa elderi – Ózbekstannan, Qyrǵyzstannan, Tájikstannan, sondaı-aq Reseıdiń Oral-Sibir óńirinen Túrkııa men Eýropaǵa jáne keri qaraı júkterdi jetkizýdiń tıimdi logıstıkasyn qamtamasyz etedi. Bul 2021 jyly Qazaqstanǵa tranzıttik tasymaldaýdan túsetin tabysty jylyna 5 mıllıard dollarǵa deıin ulǵaıtýǵa múmkindik beredi. Al, parom kesheni astyqty, munaı ónimderin, tyńaıtqyshtardy, hımıkattardy jáne basqa júkterdi Kaspıı óńiriniń shektes memleketterine aýystyryp tıeýge baǵyttalǵan. Porttardyń yńǵaıly geografııalyq ornalasýy tasymaldaý merzimi men qunyn tómendetýge múmkindik beredi, bul Kaspıı teńizi arqyly eksporttyq aǵyndy 30% arttyrady», - dedi S.Trumov.
P.Vrýblevskıı óz kezeginde Mańǵystaý oblysy men Ýkraınanyń ekonomıkanyń túrli salalaryndaǵy yntymaqtastyǵyn nyǵaıtýǵa nıetti ekenin bildirdi.
Elshi Aqtaýǵa kelgen saparynda «Aqtaý halyqaralyq áýejaıy» basshylyǵymen yntymaqtastyq múmkindikterin talqylady, «Kıev-Aqtaý» áýe baǵytyn ashýǵa kúsh salatynyn aıtty. Sonymen qatar, «Aqtaý halyqaralyq teńiz saýda porty» AQ óndiristik qýattarymen tanysty.
Aıta keteıik, Mańǵystaý oblysy men Ýkraına arasyndaǵy taýar aınalymy 2020 jyly 20 mln 474 myń AQSh dollaryn qurady. Eksport 8 mln 569 myń AQSh dollar boldy. Ýkraınaǵa hımııalyq zattar, stanoktarǵa arnalǵan qol quraldary, týrboreaktıvtik jáne týrbovınttik qozǵaltqyshtar, gaz týrbınalary, suıyq sorǵylar eksporttalady. Importqa iri qara maldyń eti, margarın; janýarlardan nemese ósimdik maılarynan jasalǵan ónimder; etıl spırti; jýý quraldary, Plastmassadan jasalǵan buıymdar; výlkandalǵan rezeńkeden jasalǵan buıymdar jáne basqalar jatady. Mańǵystaýda ýkraın kapıtalynyń qatysýymen 5 birlesken kásiporyn jáne ýkraın kapıtalynyń júz paıyz qatysýymen 14 kásiporyn jumys isteıdi.
S. Trumov Mańǵystaý oblysy men Ýkraına arasyndaǵy ózara yntymaqtastyq pen tıimdi baılanys ornatýǵa qýanyshty ekenin jetkizdi.