Aqtaý qalasynda týrıstik qonaqúı salynýda

NUR-SULTAN. QazAqparat - Aqtaý qalasynda 500 orynǵa arnalǵan týrıstik qonaqúı kesheniniń qurylysy júrýde. Bul týraly Ortalyq kommýnıkatsııalar qyzmetinde ótken brıfıngte Mańǵystaý oblysynyń ákimi Serikbaı Trumov aıtty, dep habarlaıdy QazAqparat tilshisi.

«Birinshi kezekte Aqtaý qalasynyń kýrortty aýmaǵyn damytý belgilendi. Ózderińiz bilesizder, 2018 jylǵy tamyzda Aqtaý qalasynda Kaspıı Sammıti ótti. Sammıt barysynda barlyq memleket basshylary Kaspıı teńiziniń qazaqstandyq jaǵalaýynda týrızmdi damytý úshin óńirdiń əleýeti joǵary ekenin atap ótti», - deıdi Mańǵystaý oblysynyń ákimi Serikbaı Trumov.

Bul baǵytta Elbasynyń arnaıy tapsyrmasy berilgen.

«Qazir Aqtaý qalasynda Túrkııalyq ınvestorlardyń qatysýymen quny 57 mlrd.teńge bolatyn 500 orynǵa arnalǵan týrıstik qonaq úı kesheniniń qurylysy júrýde. Nysannyń 1-kezeńi 2020 jyldyń sońynda iske qosylyp, 600 jumys orny qurylady. Qajetti mamandar qazirden bastap arnaıy oqytýdan ótip jatyr.

Týrızmdi tolyqqandy damytý maqsatynda jaǵajaı aýmaǵynda joldar qurylysy, sý, gaz jəne elektrmen qamtý jobalary jasaqtalyp, qurylys jumystaryn júrgizetin merdigerler anyqtaldy. Respýblıkalyq bıýdjetten 4 mlrd. teńge bólindi», - deıdi oblys basshysy.