Aqtaý qalasy Besinshi Kaspıı sammıtine daıyndalyp jatyr
Sammıtke daıyndyq jumystaryna arnalǵan jıynǵa óńir basshysy Eraly Toǵjanov, Aqtaý qalasynyń ákimi Ǵalymjan Nııazov, oblystyq jáne qalalyq máslıhat hatshylary, oblys jáne qala ákiminiń orynbasarlary, basqarma basshylary, iri kompanııalardyń jetekshileri, merdiger kompanııa ókilderi qatysty.
Jıyn barysynda Aqtaý qalasynyń ákimi aımaq basshysyna Kaspıı mańy elderi basshylarynyń V sammıtine daıyndyq barysyn baıandady. Onyń aıtýynsha, shaharda joldyń ortasha jóndeý jumystary júrgizilip jatyr. Josparǵa saı barlyǵy 16,6 shaqyrym jol jóndeledi. Búgingi tańda onyń 5,1 shaqyrymy jańartyldy. Qalǵan ýchaskelerde jóndeý jumystary kestege saı júrip jatyr. Budan bólek, 190 myń sharshy metr jolǵa «Redjıvasıl» suıyqtyǵy jaǵylady. Gıdrooqshaýlaǵysh ereksheligi bar materıal joldy ylǵaldan qorǵap, sapasyn jaqsartady. Sondaı-aq, jańa úlgidegi 73 baǵdarsham ornatylady.
Sammıtke qatysýshy elderdiń týlaryn ilý jumystary da qolǵa alyndy. Barlyǵy 670 jalaýsha, 110 tý ilinedi. Sondaı-aq, qalada 208 bannerdi jańartý jumystary júrgiziledi. Onda Qazaqstannyń, Mańǵystaý oblysynyń kórinisteri men Kaspıı samıtine qatysty málimetter beınelengen. Buǵan qosa, kóp qabatty turǵyn úılerdiń qabyrǵalaryna 20 brendmaýer ornatylmaq. Sonymen qatar, qalanyń ortalyq kóshelerine shaǵyn aýdandardy baǵyttaıtyn taqtaıshalar qoıý jumysy bastaldy. Jaıaý júrginshilerge arnalǵan 375 belgi 40-tan astam kóshe qıylysyna ornatylady.
Qalanyń sáýlettik kelbetin jaqsartý maqsatynda 14, 15 shaǵyn aýdandary teńiz jaǵalaýyndaǵy 14 úıdiń syrty boıalyp tolyǵymen jańartyldy. Taǵy 2 turǵyn úıdiń syrtyna syrlaý jumystary júrgizilýde. Qalanyń túngi sáýlettik kelbetin jaqsartý úshin sándik bezendirý jumysy da bastalyp ketti. Barlyǵy 720 baǵana bezendirilmek.
Qala ákimdigi kógaldandyrý jumysyna erekshe ekpin berýde. Mamyr aıynan beri 5 mln túp gúl egildi. Baqytgúl, qyrmyzy gúl, túrik qalampyry 10 shaqyrym jol boıyna egilip, kóshelerdiń jıegi jaıqala tústi. Budan bólek, qala aýmaǵynda 6,3 myń tal egildi. Jaqyn arada taǵy 7 myń pavlonııa aǵashy otyrǵyzylady.
15 shaǵyn aýdandaǵy teńiz jaǵalaýynyń 1,7 shaqyrym jeri abattandyrylyp jatyr. Onda eni 70 metrdi quraıtyn dala sahnasy boı kóteredi. Sahnaǵa 160 sharshy metr led ekran ornatý josparlanýda. Zamanaýı dybys jáne jaryq qondyrǵylarymen jabdyqtalyp, qýattylyǵy 100 kvt bolatyn kolonkalar qoıylmaq.
Al, 4 shaǵyn aýdandaǵy jartasty jaǵalaý týrıstik nysanǵa aınalady. 1,5 shaqyrym jerge jaıaý júrginshi jol tóselip, myńnan astam baspaldaq ornatylady. Ondaǵy úńgirler abattandyrylyp tabıǵı murajaı paıda bolady. Kaspıı jaǵalaýyndaǵy bul iri qurylys jumystary josparlanǵan merziminen buryn aıaqtalmaqshy. Osy oraıda óńir basshysy Eraly Toǵjanov merdiger kompanııalardyń jumysyna oń baǵa berdi. Aldaǵy ýaqytta da teńiz jaǵasyn abattandyrý jumystary ári qaraı jalǵasatynyn aıtty.
«Abattandyrý jumystaryn «Sarbaz» jaǵajaıyna deıin júrgizýdi josparlap otyrmyz. Kezinde jaǵalaýdaǵy keıbir jerler jekemenshikke ótip ketken. Ony memleketke qaıtarý kerek. Teńiz jaǵalaýy halyqtyń ıgiligine qaıtarylýy tıis. Ondaǵy jasalyp jatqan jumystyń barlyǵy tek qana halyq úshin bolýy kerek», - dedi Eraly Toǵjanov.
Jıyn sońynda óńir basshysy samıtke daıyndyqty kúsheıtip, tıisti organdarǵa qoǵamdyq tártipti qatań qadaǵalaý jóninde tapsyrmalar berdi. Іstelip jatqan jumystyń barlyǵy 5 tamyzǵa deıin aıaqtalý júkteldi.
Foto: yvision.kz