Aqtaý garnızonynyń myńnan astam teńiz jaıaý áskeri jaýyngerlik atystarǵa qatysyp jatyr

<p>ASTANA. KAZINFORM - Bólimshelerdiń jaýyngerlik atys daıyndyǵy taktıkalyq daıyndyqty oqytýdyń eń joǵary túrine jatady, ári bólimshelerdi jaýyngerlik úılestirý men atys jattyǵýlarynyń sońǵy kezeńi, dep habarlaıdy QR Qorǵanys mınıstrliginiń <a href="https://www.gov.kz/memleket/entities/mod/press/news/details/691616?lang=kk" target="_blank" rel="noopener">baspasóz</a> qyzmeti.</p>

Áskerı qyzmetshiler buǵan deıin qysqy oqý kezeńindegi mamandyq boıynsha daıyndyq barysynda shtattyq qarý-jaraq pen áskerı tehnıkanyń taktıkalyq-tehnıkalyq sıpattamalaryn zerdelep, saptyq jáne atys daıyndyǵynan derbes túrde ótken bolatyn.

Foto: QR Qorǵanys mınıstrligi

– Áskerı qyzmetshiler «Oımasha» polıgonynda qazirgi zamanǵy jalpy áskerı urysty júrgizý, qorǵanys kezinde, shabýyldaý men jergilikti jerdi barlaý barysynda is-qımyl jasaý daǵdylaryn pysyqtap jatyr. Sabaqtyń úshten biri túngi jaǵdaıda ótýde, – dep túsindirdi shabýyldaý batalonynyń komandıri maıor Farhat Manabaev.

Foto: QR Qorǵanys mınıstrligi

Bólimshelerdiń úılesimdiligi taktıkalyq tapsyrmalardy oryndaý kezinde tekseriledi. Komandırler atysty basqarý men bólimsherlerdiń urys qımyldarynan tájirıbe alsa, áskerı qyzmetshiler bólimshe quramyndaǵy is-qımyl tártibin bekitedi.

– Jaýyngerlik atystardy oryndaý kezinde bólimshe komandıriniń is-qımyly onyń bólimsheni shapshań, durys jáne naqty basqarý qabiletine qaraı baǵalanady, – dep naqtylady batalon komandıri.

Foto: QR Qorǵanys mınıstrligi

Jaýyngerlik daıyndyq is-sharalaryna 50-ge jýyq áskerı tehnıka jumyldyrylǵan. Jaýyngerlik daıyndyqtyń kelesi kezeńi vzvodtardy úılestirý bolmaq.