Aqtaý dárigerleri ókpesi 70 paıyz zaqymdalǵan júkti áıeldi aman alyp qaldy

AQTAÝ. QazAqparat - Mańǵystaý oblystyq «Ana men bala» perınataldyq ortalyǵynyń dárigerleri Covid-19 ınfektsııasymen aýyrǵan júkti áıeldi aman alyp qaldy. Naýqastyń ókpesi 70% zaqymdalǵan. Bul týraly QazAqparat oblystyq qoǵamdyq kommýnıkatsııa ortalyǵyna silteme jasap habarlaıdy.

Aqtaý qalasynyń turǵyny Baqtygúl Kabýldına perınataldyq ortalyqqa jedel járdem brıgadasymen jetkizildi. Júkti kelinshektiń ókpesine zaqymdalǵandyqtan, qursaqtaǵy balaǵa jetkilikti ottegi barmaǵan. Júkti áıel qandaı jaǵdaıda koronavırýstyq ınfektsııany juqtyrýy múmkin ekenin aıta almady.

«Bastapqyda men aýrýmen ózim kúrestim. Biraq keıinirek ózin-ózi emdeý meniń qateligim ekenin túsindim. Qorqynyshty boldy. Entigý kúsheıip, júrek toqtap qalatyndaı sezim boldy. Men endi jaqyndarymdy kórmeımin dep oıladym.

Men jáne meniń balam dárigerlerdiń arqasynda aman qaldyq. Perınataldyq ortalyqtyń medıtsına qyzmetkerlerine alǵysym sheksiz», - dedi áıel.

Aıta ketý kerek, bul Baqytgúl Kabýldınanyń otbasyndaǵy besinshi bala. Qazir áıel ózin jaqsy sezinedi. Oǵan jáne balanyń ómirine qaýip tóndip turǵan joq. Birneshe kúnnen keıin olar perınataldy ortalyqtan shyǵarylady.

Oblystyq perınataldyq ortalyq bazasyndaǵy ınfektsııalyq bólimshede 40 áıel em alýda. Onyń 5-ýi aýyr halde. Olar jansaqtaý bólimine aýystyrylyp, ÓJJ apparatyna qosylǵan.

Dárigerler júktilik respıratorlyq vırýstyq ınfektsııalardan aýyr derttiń qaýpin arttyratynyn eske salady. Sondyqtan júkti áıelderge koronavırýsty juqtyrý múmkindigin azaıtý úshin qatań oqshaýlaý rejımi usynylady.

Sonymen qatar, koronavırýstyq ınfektsııamen aýyratyn áıelder júktilikti josparlamas buryn tekserýden ótýi kerek. Ásirese saýyqqannan keıin eki aıdan keıin entigý ketpeıtin áıelder tekserýden ótýi kerek.