Aqtaý áýejaıynda júk tıeýshi jolaýshylardyń sómkesinen altyn buıymdar urlaǵan

AQTAÝ. QazAqparat - Kólik polıtsııasy quny 1 mln teńgege jýyq altyn buıymdardy urlaǵan Aqtaý áýejaıynyń júk tıeýshisin ustady, dep habarlaıdy Polisia.kz.

Áýejaıdyń júk tıeýshisiniń zańsyz áreketterinen «Aqtaý – Antalııa» jáne «Aqtaý – Almaty» reısteriniń eki jolaýshysy zardap shekken.

Mańǵystaý stantsııasyndaǵy jelilik polıtsııa bólimine «Aqtaý – Antalııa» baǵytyndaǵy áýe reısiniń 41 jastaǵy jolaýshysy júginde bolǵan altyn buıymdardyń (eki neke saqınasy, eki syrǵa, bilezik, alqa) urlanǵanyn aıtyp shaǵymdandy.

Onyń aıtýynsha, osyǵan uqsas ótinish kólik polıtsııasyna Almaty qalasynyń 42 jastaǵy turǵynynan da kelip túsken.

Ol «Aqtaý – Almaty» baǵytyndaǵy áýe reısimen úıine ushyp kelgennen keıin júgine salynǵan altyn buıymdardyń (gaýhar tastary bar sary jáne aq altynnan jasalǵan syrǵa-saqınalar) joǵalǵanyn anyqtaǵan.

Jábirlenýshilerge kelgen zalal somasy 930 myń teńgeni qurady.

– Jedel-izdestirý is-sharalaryn júrgizý barysynda kólik saqshylary áýejaıdyń 30 jastaǵy júk tıeýshisin anyqtap, ustady. Kúdiktiniń Mańǵystaý oblysynyń turǵyny ekeni belgili boldy. Ol óz kinásin moıyndady. Zattaı dáleldemeler tárkilenip, ıelerine qaıtaryldy. Tergeý júrgizilýde, – dedi Kóliktegi polıtsııa departamentiniń bastyǵy Ońal Bekeev.

Foto: polisia.kz/