Aqtaý áýejaıy Tegerannan alǵashqy charterlik reısti qabyldady

AQTAÝ. QazAqparat – Aqtaý áýejaıy Tegerannan alǵashqy charterlik reısti qabyldady. Iran áýekompanııasynyń ushaǵymen Mańǵystaý oblysyna 137 týrıst keldi, dep habarlaıdy QazAqparat Mádenıet jáne sport mınıstrliginiń baspasóz qyzmetine silteme jasap.

Osy demalys kúnderi Aqtaýǵa Iran eliniń týrısterimen ekinshi reıs keledi. Bıyl basqa elderderden de charterlik reıster kútilip otyr.

Aıta ketsek, ótken jyly Qazaqstan Iran, Qytaı jáne Úndistan azamattary úshin 14 kúndik vızasyz rejım engizgen bolatyn.

«Aqtaý Irannan kelgen qonaqtar arasynda zor suranysqa ıe, sondyqtan ırandyq týroperatorlar uıymdastyrǵan áýe reısteri men týrlar kóp kúttirmedi. Biz qazir keletin qonaqtardyń sanyn kóbeıtý úshin jumys istep jatyrmyz, sondyqtan aldaǵy ýaqytta mundaı reısterdiń de sany artýy kerek. Bolashaq seriktestermen kelissózder únemi júrgizilip otyrady», - dedi Týrızm ındýstrııasy komıtetiniń tóraǵasy Dastan Ryspekov.