Aqtaý áýejaıyna qatysty tergeý qaıta jalǵasady

<p>AQTAÝ. KAZINFORM &mdash; Básekelestikti qorǵaý jáne damytý agenttiginiń Mańǵystaý oblysy boıynsha departamenti &laquo;Aqtaý halyqaralyq áýejaıy&raquo; AQ-na qatysty tergep-tekserýdi qaıta bastady.</p>

Tergeýge avıaotyndy saqtaýǵa arnalǵan rezervýarlardy jalǵa berý qyzmeti boıynsha monopolııalyq joǵarǵy baǵa belgileý negiz bolyp otyr.

«Avıaotyndy saqtaý erekshe taýar naryǵyna jatady. Áýejaıda qyzmet kórsetý qaǵıdalaryna sáıkes, avıakompanııalar tasymaldaý qyzmetin júzege asyrý úshin avıatsııalyq otynnyń saqtalýyn áýejaıdyń ózi qamtamasyz etýi kerek. Alaıda onyń ornyna áýejaı zańnamada kózdelgen tikeleı mindettemesinen ózin-ózi shettetip, rezervýardy tıisti taýar naryǵyndaǵy eń joǵary baǵamen avıakompanııalarǵa jalǵa bergen. Áýejaı monopolııaǵa qarsy vedomstvonyń dálelderimen kelispeı, monopolııaǵa qarsy organnyń tekserý júrgizý týraly buıryǵyn zańsyz dep taný jáne kúshin joıý jóninde sotqa talap aryz túsirgen bolatyn. Uzaqqa sozylǵan (1 jyl 3 aı) sot nátıjesinde Joǵarǵy sottyń qaýlysymen talapkerdiń shaǵymy qanaǵattandyrýsyz qaldyryldy» dep jazylǵan vedomstvo taratqan aqparatta.

Qazirgi ýaqytta tergeý jalǵasyp jatyr.

Elimizdiń monopolııaǵa qarsy zańnamasy boıynsha zań buzý derekteri anyqtalǵan jaǵdaıda tıisti sharalar qabyldanbaq.