Aqtalǵan degen sózdiń ózi unamaıdy — jeltoqsanshy Aıap Ydyrys

<p>Osydan 37 jyl buryn solaqaı saıasatqa qarsy shyqqan ór rýhty qazaq jastary búginde aǵa býynǵa aınaldy. Olar elimizdiń ár aımaǵynda jemisti eńbek etip júr. Sonyń biri — Almaty turǵyny, «Táýelsizdik 1986 Jeltoqsan» uıymy tóraǵasynyń orynbasary Aıap Ydyrys, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aıap Ydyrys 1986 jyly Almatydaǵy mal dárigerlik ınstıtýtynda oqyp júrgen. Áskerden kelgen oń-solyn tanyp qalǵan jigit bolatyn.

16 jeltoqsanda halyq kóterilgende ózi sııaqty birneshe stýdent jataqhanadaǵy qyz-jigitterdi uıymdastyryp, alańǵa bastap barǵan.

Beıbit sherýdiń sońy qaqtyǵysqa ulasyp ketedi dep múldem oılamaǵan eken.

Onyń aıtýynsha, Jeltoqsan oqıǵasy — Táýelsizdiktiń jarshysy boldy. Egemendik ońaılyqpen kelgen joq. Biraz jas qyrshynynan qıylyp, birazynyń ómiri tas-talqan boldy.

«Jalyndy jastar beıbit sherý bolady degen oımen alańǵa jınaldyq. Biraq qystyń yzǵarly kúninde totalıtarlyq júıeniń qaharyna ushyradyq. BTR-lardy dybysyn shyǵarmaı, otaldyrmaı súırep ákeldi. Soldattar eshkimdi aıamady. Qyzdardy da soqqyǵa jyqty. Sol kezde qyz balany uryp jatqanda qalaı qarap turasyń? Bárimizdiń qaryndasymyz, ápkemiz bar. Olardy qorǵaýǵa tyrystyq. Sodan beri 40 jylǵa jýyq ýaqyt ótse de, bári kóz aldymda», — deıdi «Táýelsizdik 1986 Jeltoqsan» uıymy tóraǵasynyń orynbasary Aıap Ydyrys.

Aıtýynsha, búkil osyndaı uıymdardyń eń basty máselesi — jeltoqsanshylarǵa aqtalǵan degen mártebe alý.

«Qaıta-qaıta hat jazyp jatyrmyz. Aldy 70-ke keldi. Eń jasy 55-te. Aqtalǵan degen sózdiń ózi unamaıdy. Ne úshin aqtalasyń? Elimniń bolashaǵy úshin, egemendigi úshin alańǵa shyqtyq», — deıdi ol.