Aqsýda ǵaryshtan tekserý arqyly 167 zańsyz qoqys orny anyqtaldy

AQSÝ. QazAqparat - «Qazaqstan ǵarysh sapary ulttyq kompanııasy» AQ geoportalynyń tekserisi barysynda 2019 jyly Aqsý qalasynyń mańynan 167 zańsyz qoqys orny anyqtalǵan, dep habarlaıdy QazAqparat pavlodarnews.kz silteme jasap.

Alǵabas aýylynda ǵana geoportal málimetterine sáıkes, 33 zańsyz qoqys orny bar. Tekseris nátıjeleri boıynsha qaldyqtarmen jumys jasaýda ekologııalyq zańnama normalaryn saqtaý boıynsha sharalar qoldanbaǵany úshin okrýg ákimine 18 938 teńge aıyppul salyndy.

Alǵabas aýyldyq okrýgynyń ákimi Merhat Ýalıtovtyń málimdeýinshe, qoqys polıgonyn joıý úshin bıylǵy jylǵa 500 myń teńge bólingen.

Keıin Pavlodar oblystyq máslıhatynyń ekologııa jáne qorshaǵan ortany qorǵaý komıssııasynyń qoldaýy arqyly bıýdjetti sońǵy naqtylaý kezinde qosymsha 5 mln qarjy bólindi.

«Jeltoqsan aıynyń sońyna deıin osy qoqys oryndaryn tolyqtaı joıýdy josparlap otyrmyz. Aýyldyń qasyndaǵy qoqys ornynyń birinde buryn mal sharýashylyǵy kesheni bolǵan. Jalpy aýmaǵy 8,6 gektar. Bul SSSR kezinnen beri qalǵan, ıaǵnı shamamen 20-30 jyl ótken. Bul jerge aýyl turǵyndarynan basqa, kórshi aýyldardyń adamdary da qoqys tógedi. Osy mańaıda qoqys orny úshin eki gektar jer bólindi. Qoqystardyń barlyǵy sol jaqqa shyǵarylatyn bolady», - deıdi Merhat Ýalıtov.

Sonymen qatar, aýyl ákimi bólingen jerge qorshaý qoıylatynyn atap ótti. Biraq qoqysty bólek jınaý úshin tseh qajet. Qazirgi taldaý boıynsha, osy aýylǵa mundaı tseh salý úshin 15 mln teńge qarjy qajet.