Aqsý, Kóksý qant zaýyttaryna 600 myńdaı tonna ónim ótkizildi

<p>TALDYQORǴAN. KAZINFORM &mdash; Jetisý oblysynda bıyl qant qyzylshasynan rekordtyq ónim alynyp, 635 myń tonna qant qyzylshasy jınaldy. Búgingi kúnge sonyń 600 myńdaı tonnasy Aqsý, Kóksý qant zaýyttaryna ótkizildi. Qos kásiporynda qabyldaý jumystary jalǵasyp jatyr,&nbsp;- dep habarlady Jetisý oblysy ákiminiń baspasóz qyzmeti. &nbsp;</p>

Oblystyq Aýyl sharýashylyǵy basqarmasynyń málimetine qaraǵanda, óńirdegi usaq sharýashylyqtar óz ónimderin zaýyttarǵa ótkizip bitken. 

Foto: Dmıtrıı Erofeev, Jeńis Ysqabaı

- Oblystaǵy usaq sharýashylyqtar ónimderin qant zaýyttaryna óńdeýge ótkizip boldy. Búgingi kúnge tek 12 iri sharýashylyq qaldy, olar óz kólikterimen jáne kólik jaldap, ónimderin tasymaldap jatyr. Jalpy oblys boıynsha búginge deıin ótkizilgen ónimniń lastyǵy 7,6% bolǵan, qar jaýǵannan keıingi eki kúnde bul kórsetkish 11,2% kóleminde tur. Jalpy bıyl qant qyzylshasynan 635 myń tonna ónim aldyq. Biz tuqym sebýden ónimdi jınap, ótkizýge deıingi barlyq protseste sharýashylyqtarǵa qajetti qoldaý kórsetip kelemiz, - dedi oblystyq Aýyl sharýashylyǵy basqarmasynyń basshysy Nurdáýlet Kenenbaev.

Aqsý qant zaýyty búginge deıin 340 myńnan astam, al Kóksý zaýyty 254 myń tonna ónim qabyldaǵan. Eki kásiporynda da qabyldaý áli de jalǵasyp jatyr. Aqsý qant zaýytynyń dırektory Samat Nadırbaevtyń aıtýynsha, óz óńirimizdegi ónimmen qatar Jambyl oblysynan da qant qyzylshasyn qabyldap jatyr. Al Kóksý qant zaýyty bıyl 260 myń tonnaǵa deıin qyzylsha qabyldaýdy josparlap otyr. 

Foto: Dmıtrıı Erofeev, Jeńis Ysqabaı

- Búgingi tańda 254 myń tonna qant qyzylshasy qabyldanyp, sonyń 164 myń tonnasy óńdeldi. Zaýyt belgilengen qýatynda jumys istep tur. Jalpy osy jylǵa deıin 200 myń tonna qyzylsha qabyldaıtynbyz. Bıyl ónim mol bolǵandyqtan, oǵan qosymsha taǵy 60 myń tonna qosylady dep josparlanyp otyr. Búgingi kúni sharýashylyqtarmen eseptesip, 2,5 mlrd teńge tólem jasadyq. Ónim ótkizgenine qaraı ýaqytyly esep aıyrysamyz, - deıdi Kóksý qant zaýytynyń dırektory Altynbek Abatov.

Máselen, «Arman» sharýa qojalyǵynyń jetekshisi Arman Bekbasov bıyl qyzylshanyń tez pisetin gıbrıd tuqymyn seýip, ónimdi ýaqytyly jınap alǵanyn aıtady. 

Foto: Dmıtrıı Erofeev, Jeńis Ysqabaı

- Aýa raıynyń jaıyn baǵamdadyq, óz múmkindikterimizdi saraladyq, onyń ústine tez pisetin tuqym sepkendikten, ónimdi ýaqytyly jınap aldyq. Aqsý qant zaýytyna qyzylsha tapsyrǵannan keıin bir aptanyń ishinde zaýyttan beriletin tıisti tólemdi, on kúnniń ishinde memleketten beriletin sýbsıdııany aldyq, - deıdi A.Bekbasov.

Eske salsaq, bıyl qant qyzylshasynyń egis alqaby Jetisý oblysynda 1,7 esege ulǵaıyp, 13,7 myń gektarǵa jetkizildi, odan 635 myń tonna tátti túbir jınaldy. Eki qant zaýytynda 94 myń tonna qant óndirý josparlanǵan. Onyń 64 myń tonnasy qant qyzylshasynan shyǵarylady. Sol sııaqty qyzylsha ósiretin 5 aýdanda 8 jańa servıstik-daıyndaý ortalyǵy qurylyp, 30 sharýa qojalyǵyna quny 2,5 mlrd teńgege qant qyzylshasy óndirisine qajetti 62 birlik tehnıka satyp alyndy.

Foto: Dmıtrıı Erofeev, Jeńis Ysqabaı

Jetisýlyqtar aıazda qant qyzylshasyna kezekte turýǵa májbúr ekenin jazǵan bolatynbyz.