«Aqsý» klýby keı fýtbolshylarǵa shamadan tys jalaqy tólep otyrǵan — antıkor

<p>PAVLODAR. KAZINFORM — Klýb basshylyǵynyń bıýdjet qarajatyn zańsyz jaratýyna qatysty jemqorlyq táýekelderi anyqtaldy. Komanda músheleriniń keıbiri 2 mln teńgeden kóp jalaqy alyp otyrǵan.</p>

Bul jaıynda Sybaılas jemqorlyqqa qarsy is-qımyl agenttiginiń Pavlodar oblysy boıynsha departamentiniń basshysy Medet Amralınov habarlady.

— «Aqsý» kásipqoı fýtbol klýbyn qarjylandyrý boıynsha bizdiń tarapymyzdan suraqtar bar. Klýbtan birqatar korrýptsııalyq táýekelder anyqtaldy. Kezinde ondaǵy fýtbolshylardyń eńbekaqysy 2 mln teńgeden aspaýy tıistigi kórsetilgen arnaıy hattama bekitilgen. Biraq buǵan qaramastan osy ýaqytqa deıin keıbir sportshylar odan kóbirek jalaqy alyp kelgen. Uıymda aýdıt júrgizildi, qazir protsessýaldyq sheshim qabyldaý týraly másele qarastyrylyp jatyr, — dedi departament basshysy.

Antıkor qyzmeti buǵan qosa Pavlodar óńiriniń jalpy sport salasynan birqatar kemshilikterdi anyqtaǵan.

Atap aıtqanda, jalǵan oqý-jattyǵý jıyndary ótkizilip, sporttyq razrıadtar negizsiz túrde berilgen.

Al sport uıymdarynyń 9 qyzmetkeri jalǵan dıplommen jumys istep kelgen.

Sondaı-aq, jańadan qabyldanǵan qyzmetkerlerge ústemeaqylardyń negizsiz tólenýi, ulttyq quramalarda sheteldik sportshylardyń bolýy sııaqty faktiler de tirkelip otyr.

Buǵan deıin pavlodarlyq prokýrorlar Ertis-Baıan óńirinde 210 myń gektar jerdiń zańsyz berilgenin habarlaǵan edik.