Aqsý qant zaýyty bıyl 100 myń tonna ónim qabyldaýdy josparlaýda

TALDYQORǴAN. QazAqparat - Búgin Almaty oblysynyń ákimdigi men «Energosmost» konsortsıýmy Aqsý qant zaýytyn iske qosý jóninde ózara yntymaqtastyq  týraly memorandýmǵa qol qoıdy.

Bul týraly búgin oblys ákimi Amandyq Batalovtyń tóraǵalyǵymen ótken qant qyzylshasy óndirisin damytý jónindegi jıynda belgili boldy, dep habarlaıdy QazAqparat tilshisi.

Qujatqa oblys ákimdigi tarapynan óńir basshysynyń  orynbasary Serikjan Beskempirov jáne «Energosmost» konsortsıýmynyń damý jónindegi dırektory Sáken Muratov qol qoıdy.

S. Muratovtyń aıtýynsha, qazirgi kezde Aqsý qant zaýytyn jańǵyrtý jobasyn júzege asyrý boıynsha belsendi jumys júrip jatyr. Jalpy bul jobaǵa bıylǵy jyly 8 mlrd. teńge baǵyttaý josparlanýda, onyń 2 mlrd. teńgesin «Jetisý» ÁKK arqyly oblys ákimdigi bólgen. Negizgi tehnologııalyq qurylǵylardy aýystyrý, ǵımaratty jóndeý, otyn satyp alý, TETs-ti qalpyna keltirý, mamandardy iriktep, qaıta oqytý syndy atqarylatyn jumys aýqymdy.

"Jospar boıynsha Aqsý qant zaýyty jyldyń sońyna qaraı iske qosylady. Al qyrkúıektiń sońy-qazannyń basynda shıkizat qabyldana bastaıdy. Jalpy bıylǵy jyly 80-100 myń tonna qant qyzylshasyn óńdeıtinimizdi josparlap otyrmyz", - dedi S. Muratov.

Oblys ákimi A.Batalov Aqsý qant zaýytynyń iske qosylýy -mańyzdy tarıhı oqıǵa bolatynyn aıtty.

Aıta ketý kerek, qazir óńirde bir ǵana "Kóksý qant zaýyty" jumys istep tur. Sharýalar kúz kezinde ónimderin ótkizý úshin atalǵan mekemeniń aldynda túnep, biraz qınalǵan bolatyn.