Aqsý qalasynda jylý jelileri jańartylady
Bul jaıynda Aqsýǵa jumys saparymen barǵan oblys ákimi Asaıyn Baıhanov áleýmettik jelide jazdy.
«Keshe Aqsý qalasyna baryp, elektr stantsııasy men ferroqorytpa zaýytynyń jumysymen tanystym. Barlyǵy 10 000-nan astam adam eńbek etetin kásiporyndar belsendi jumys istep, damyp keledi. Kúrdeli jóndeýdi qajet etetin qalalyq aýrýhanany qarap shyqtym. Densaýlyq saqtaý basqarmasy emdeý mekemesine aýdanaralyq mártebe berý múmkindigin qarastyryp jatyr. Bul shara aýrýhanany respýblıkalyq bıýdjet esebinen jaraqtandyrýǵa múmkindik beredi. Usynysty qoldadym, qujattardy tıisti mınıstrlikke jiberemiz»,- dep jazdy ákim Instagram paraqshasynda.
Aıtýynsha, Aqsý qalasyn damytý jónindegi keńeste jańa turǵyn úılerdiń tapshylyǵy men sapasy, jer ýchaskesin bólý, abattandyrýǵa qatysty jıi túsetin shaǵymdar qaralǵan.
«Jańa qazandyqty iske qosý máselesi jeke qaraldy. Kóp ınvestıtsııa quıylǵan, biraq áli de iske aspaǵan jobany zertteýdi tapsyrdym. Aqsý qalasynyń ákimdigi barlyq ınjenerlik kommýnıkatsııalarǵa aldyn ala tekserý júrgize otyryp, magıstraldyq jáne jylý taratý jelilerin qaıta jańartýǵa kirisedi»,- dep túıindedi Asaıyn Baıhanov.