Aqsý qalasynyń jylý júıesindegi apattyq jaǵdaı joıyldy
— Saǵat 19.00-degi jaǵdaı boıynsha Aqsý qalasynyń turǵyn úıleri men áleýmettik nysandaryn jylýmen qamtamasyz etý úshin ROK-2-den beriletin temperatýra 80/95 gradýs, qysym 8.4/2.1 kgs/sharshy santımetrdi qurady. 5 jelilik sorǵy men 3 qazandyq jumys istep tur. Turǵyn úı ınspektsııasy bóliminiń jáne «Teploservıs-Aqsý» KMK mamandary parametrlerdi tekserý jáne retteý úshin kópqabatty turǵyn úılerdi tekserý jumystaryn júrgizip jatyr, - dep habarlady qalalyq ákimdikten.
Qala basshysy Bolatbek Sháripovtiń aıtýynsha, jylý beretin qazandyq Aqsý ferroqorytpa zaýytynyń aýmaǵynda ornalasqan. Onda 4 jylý, 2 bý qazandyǵy bar. Qalypty kúnderi eki qazandyq qana jumys istep, kún aıazdatqanda, ásirese, aıazdy túnderi úshinshisi, qajet bolsa tórtinshisi iske qosylady. Shaharda 50 700 adam tursa, turǵyn úılerdiń 257-si ortalyqtandyrylǵan jylý júıesine qosylǵan.
Jalpy Aqsýdaǵy jylý jelileriniń uzyndyǵy 90 shaqyrymdaı bolady. Jylý qubyrlarynyń 67 paıyzy tozǵan. Ákimniń aıtýynsha, keler jyly shahardyń jelilerinde keń aýqymdy synaqtar júrgizilip, olardy jańartýǵa respýblıkadan qarajat suralatyn bolady.
Eske sala keteıik, búgin tańerteń Aqsýdyń jylý júıesinde apat bolyp, úılerde jylý tómendep ketkeni týraly jazǵanbyz.
Aqsýda budan birer jyl buryn jańa qazandyq salynyp qoıǵan.
Qurylysyna 11 mlrd teńge jumsalǵan qazandyqty komıssııa áli kúnge qabyldamaı otyr. Aıtýlarynsha, tehnologııalyq júıesinde kemshilik bar. Onyń qashan tolyq iske qosylatynyn eshkim aıta almaıdy.