Aqsholaqov, Omarov, Tıhonıýk «Astana qalasynyń qurmetti azamaty» atandy

ASTANA. QazAqparat – Búgin Astana qalalyq máslıhatynyń otyrysynda 3 azamatqa «Astana qalasynyń qurmetti azamaty» ataǵy berildi, dep habarlaıdy QazAqparat tilshisi.

«Osy jyldar ishinde astanamyz shaǵyn qaladan bilim berý, medıtsınalyq, mádenı jáne iskerlik ortalyqqa aınalǵan megapolıs boldy. Astanamyzdyń ósip-órkendeýi, eń aldymen, azamattardyń eseli eńbegine tikeleı baılanysty. Osy oraıda, elordanyń qalyptasýy men damýyna qomaqty úles qosqany úshin «Astana qalasynyń qurmetti azamaty» ataǵyna kelesi kandıdattardy usynamyn. Aqsholaqov Serik Qýandyquly – uzaq jyldar densaýlyq saqtaý salasynda qyzmet atqaryp kele jatqan medıtsına ǵylymdarynyń doktory, professor, Ulttyq Neırohırýrgııa ortalyǵynyń basqarma tóraǵasy. Densaýlyq saqtaý salasyn damytýdaǵy asa úzdik jetistikteri úshin «Qazaqstannyń Eńbek Eri» ataǵynyń ıegeri. Serik Qýandyquly elimizdi álemdik dárigerlik qoǵamdastyqty dáripteıdi», - dedi máslıhat otyrysyna qatysqan elorda ákimi Jeńis Qasymbek.

Qala basshysynyń atap ótýinshe, Serik Qýandyqulynyń basshylyǵymen jáne tikeleı qatysýymen 60-tan astam jańa tehnologııa engizildi. Olar buryn bizdiń elde oryndalmaǵan. Sonymen qatar, 2005 jyly Dúnıejúzilik dárigerler uıymynyń «Álemniń qamqor dárigeri» ataǵyna ıe boldy. Onyń basshylyǵymen Neırohırýrgııa ortalyǵynda 5 myńnan astam operatsııa jasalyp, elimizdiń neırohırýrgııa salasy halyqaralyq dárejege jetti.

Foto: parlam.kz

«Omarov Qaısar Ospanuly – Qazaqstan Respýblıkasynyń qoǵam qaıratkeri, Parlament Senatynyń depýtaty, elimizdiń eńbek sińirgen qaıratkeri. Qaısar Ospanuly zańnamalyq bazany jetildirý boıynsha úlken jumys júrgizdi. Osy kisiniń basshylyǵymen qurylys, úlestik qatysý jáne taǵy basqa máseleler boıynsha zańnamalyq baza sapaly túrde jaqsartyldy. Jobalarmen jumys isteý kezinde qala qurylysyn josparlaý, jer ýchaskelerin bólý, jobalaý jáne qurylys kezinde sý qorǵaý jáne tabıǵat qorǵaý tártibin saqtaý máseleleri boıynsha, saýda-ónerkásip palatalarynyń qyzmeti máseleleri boıynsha jáne basqa da birqatar zań jobalaryna 80-nen astam túzetýler engizdi», - dedi elorda ákimi.

Jeńis Qasymbek sonymen qatar elimizdiń eńbek sińirgen qurylysshy Tıhonıýk Nıkolaı Petrovıchke de osy ataqty berýdi usyndy.

Foto: gosekspertıza.kz

«Elordany aýystyrǵan sátten bastap qala ákiminiń birinshi orynbasary, Saryarqa aýdanynyń ákimi qyzmetinde boldy. Jańa Astananyń qurylysyna úlken úles qosty. Onyń tikeleı basshylyǵymen kóptegen úkimettik nysandar salyndy: jańa Astananyń basty sımvoly -«Báıterek»kesheni, álemdegi eń bıik shatyrly ǵımarat - «Han Shatyr» saýda, oıyn-saýyq ortalyǵy, teńizden eń alys ornalasqan «Dýman» okeanarıýmy, «Astana» Opera jáne balet teatry», 10 myń oryndyq biregeı «Sary-Arqa» velotregi jáne memlekettik nysanaly baǵdarlamalarǵa kiretin kóptegen basqa jobalar. Osy jobalar arqasynda elorda turǵyndarynyń ómir súrý deńgeıi men jaǵdaılary artty», - dedi ol.

Máslıhat depýtattary bul usynysty biraýyzdan qoldady.