Aqshasy kóp kásipkerlerdi saıasatqa jolatpaýymyz kerek – Azamathan Ámirtaev
«Bizdiń partııanyń basty maqsaty – qorshaǵan ortany qorǵaý jáne adam densaýlyǵy. Bul – ómirdegi eń mańzdy qundylyq bolyp sanalady. 30 jyl zaýyttardy, kásipkerlikti qoldaımyz dep, myna partııalar qoldaý kórsetti. Sońynda ne boldy?! Adamdarymyz aýrýǵa shaldyqty. Biz saılaý kezeńinde kóp zaýyttarǵa bardyq. Qanshama aýrý adamdar bar. Olardyń jaǵdaıyn kim oılap jatyr? Eger ár óndiris adamǵa baqyt ákelmeıtin bolsa, onyń bizge keregi ne?! Sondyqtan biz úshin birinshi kezekte - qorshaǵan orta, ekinshi – adam densaýlyǵy. Búginde kásiporyndar 364 mln tonna SO2 gazyn aýaǵa bólip otyr. Qanshama mıllıondaǵan adamdar aýrýǵa shaldyǵyp jatyr. Kóptegen múgedek balalar týyp jatyr. Sondyqtan biz qatty turmystyq qaldyqtardy qaıta óńdeý, energetıka máselesine kóńil bólýimiz qajet», - dedi Azamathan Ámirtaev.
Bul máseleden bólek, ol jergilikti ózin-ózi basqarý organdary týraly jańa zań qabyldaý qajet ekenin atap ótti.
«Sonymen qatar, búgingi kúni áleýmettiń jergilikti basqarý júıesimen baılanysy joq. Sol úshin jańa zańdy tez arada qabyldaýymyz kerek. Eger biz parlamentke baratyn bolsaq, jergilikti ózin-ózi basqarý zańyn qolǵa alamyz. Sol arqyly biz jergilikti halyqtyń bılikke daýysy jetetindeı etip jasaımyz», - dep toqtaldy «Baıtaq» partııasynyń ókili Azamathan Ámirtaev.
Pikirsaıys barysynda partııa ókili saıasatqa kásipkerlerdiń kelýin toqtatý qajet degen paıym aıtty.
«Myna aqshasy kóp kásipkerlerdi saıasatqa jolatpaýymyz kerek. Bizge qarapaıym halyqtan shyqqan azamattar kerek. Adal azamattar kerek. Óıtkeni, 30 jyl boıy zańnyń barlyǵy kásipkerler úshin jazyldy. Biz osyny toqtatýymyz kerek», - dep oıyn túıindedi Azamathan Ámirtaev.