Aqsha jymqyrý, para alý: UQK eks-tóraǵasynyń orynbasary taǵy tergelip jatyr

<p>ASTANA. KAZINFORM &ndash; Ulttyq qaýipsizdik komıtetiniń eks-basshysy Kárim Másimovtiń burynǵy orynbasary Dáýlet Erǵojın Qylmystyq kodekstiń eki baby boıynsha kúdikke ilinip, tergeý júrip jatyr. Bul týraly Ulttyq qaýipsizdik komıteti habarlady.</p>

«D. Erǵojınge qatysty tergeý qylmystyq kodekstiń «Qylmystyq jolmen alynǵan aqsha men ózge de múlikti zańdastyrý (jymqyrý)» 218-babynyń 3-tarmaǵynyń 3) tarmaqshasynda jáne «asa iri mólsherde para alý» 366-babynyń 4.4-bóliginde kózdelgen quqyq buzýshylyq belgileri boıynsha jalǵasyp jatqanyn habarlaımyz», - delingen redaktsııa joldaǵan saýal jaýabynda. 

Sondaı-aq, UQK Qylmystyq-protsestik kodekstiń 201-babynyń 1-bóligine sáıkes sotqa deıingi tergep-tekserýdiń egjeı-tegjeıi jarııa etilmeıtinin jetkizdi. 

Buǵan deıin BAQ betterinde Dáýlet Erǵojınniń «GitHub» qytaılyq servısterine qazaqstandyqtardyń jeke derekteriniń taralýyna baılanysty is boıynsha kúdikke ilikkeni týraly aqparat taraǵan edi. 

Eske sala keteıik, 2023 jylǵy 24 sáýirde Astana qalasynyń qylmystyq ister jónindegi mamandandyrylǵan aýdanaralyq sotynda Kárim Másimov pen onyń burynǵy orynbasarlaryna qatysty úkim shyqty. 

Dáýlet Erǵojın bılikti kúshpen basyp alǵany, bılik pen laýazymdyq ókilettikterdi asyra paıdalanǵany úshin kináli dep tanyldy. Oǵan memlekettik qyzmette qyzmet etý quqyǵynan ómir boıyna aıyra otyryp, 15 jyl bas bostandyǵynan aıyrý jazasy taǵaıyndaldy.