AQSh-tyń taldaý ortalyǵy Qazaqstan týraly maqala jarııalady

ASTANA. QazAqparat - The Atlantic Council halyqaralyq qatynastar salasyndaǵy amerıkalyq taldaý ortalyǵy Qazaqstannyń latyn álipbıine kóshý máselesin qaýzaǵan maqala jarııalady, dep habarlaıdy QazAqparat.

«Qazaqstan ulttyq mádenı kodyn jasap jatyr,  alaıda bul ózgeristerge el ishinde alańdaýshylyq tanytyp jatqandar bar. Jalpy latyn álipbıi Qazaqstannyń halyqaralyq yqpaldastyǵyn arttyryp, ekonomıkalyq, tehnologııalyq jáne ǵylymı ázirlemelerin yntalandyrady.  Latyn álipbıi qazaq úshin jańa dúnıe emes...», - dep jazylǵan amerıkalyq ortalyq jarııalaǵan materıalda.

Memleket basshysy 2017 jyldyń aıaǵyna deıin ǵalymdardyń kómegimen barsha qoǵam ókilderimen aqyldasa otyryp, qazaq álipbıiniń jańa grafıkadaǵy biryńǵaı standartty nusqasyn qabyldaý kerektigin aıtty. Sondaı-aq Nursultan Nazarbaev 2025 jylǵa qaraı barlyq is qaǵazdary, merzimdi basylymdar men kitaptardy latynmen shyǵarýdy tapsyrdy.

Osman jáne Reseı ımperııalary qulaǵannan keıin túrik halyqtary arab jáne latyn álipbılerin paıdalanyp keldi. KSRO ydyraǵannan keıin Ázerbaıjan, Túrkimenstan, Ózbekstan krılıtsadan  latyn álipbıine qaıta kóshti. Qazaqstan ǵalymdary dıakrıtıkalyq belgileri bar bazalyq latyn álipbıin paıdalanyp, qazaq tilinde jazý ońaı ekenin aıtady.

«Qazaq tiliniń latyn álipbıine kóshýin álemdik ekonomıkaǵa barynsha tyǵyz ıntegratsııalanýǵa qadam dep boljaýǵa bolady. Bul  jıyrma birinshi ǵasyr qazaqtaryna álemniń ozyq elderimen tyǵyz qarym-qatynas ornatýǵa múmkindik beredi», - dep jazylǵan maqalada.