AQSh-tyń ońtústiginde bolǵan tabıǵat apatynan 100 myńnan asa adam zardap shekti
Tehasta bolǵan kúshti jel 170 myńnan asa adamdy jaryqsyz qaldyrdy, - dep habarlady beısenbi kúni «Oncor» Tehas kommýnaldy kompanııasy. Tornadodan Dallas, Franklın jáne Hopkıns okrýgteri de zardap shegip, qatty jel tirkemesi bar birneshe kólikti aýdaryp jibergen. Shrıvport qalasyndaǵy Lýızıana shtatynyń ýnıversıteti daýyldan keıin shamaly búlindi. Jeldiń kúshtiligi sonsha, oqý ǵımaratynyń janyndaǵy turaqta turǵan eki kólik konteınerin ornynan jyljytyp jibergen. Kalıfornııa turǵyndary qysqy daýyl saldarynan qar qursaýynda qaldy. Shtat bıligi ońtústiktegi taýly aýdandarǵa azyq-túlik pen basqa da kerek-jaraqty jetkizý úshin tikushaq paıdalanýdy josparlap otyr. Gýbernator Gevın Nıýsom 13 okrýgte tótenshe jaǵdaı jarııalady, al San-Bernardıno okrýginiń sherıfi zardap shekkenderge qutqarý quraldary tikushaqpen jetkiziletinin habarlady. Órt sóndirý qyzmetiniń deregi boıynsha, keıbir taý mańyndaǵy eldimekenderde 10 fýtqa deıin (3 metr) qar jaýǵan, qutqarý týraly 100 ótinish túsken.
Sondaı-aq Krestlaın qalasynda azyq-túlik dúkeniniń shatyry qulady. Kalıfornııalyq «Caltrans» kólik mınıstrligi táýlik boıy qar tazalaý jumystary júrip jatqanyn málimdedi. Joǵarydaǵy shtat bıliginiń málimetinshe, qaza tapqandar týraly aqparat kelip túsken joq.