AQSh-tyń memlekettik qaryzy rekordtyq 31 trln dollarǵa jetti

VAShINGTON. QazAqparat - AQSh Qazynashylyǵynyń jarııalaǵan esebine sáıkes, eldiń jalpy memlekettik qaryzy 31 trıllıon dollardan asty, dep habarlaıdy QazAqparat ABC News-ke silteme jasap.

Kongrestiń bıýdjettik basqarmasy osy jyldyń basynda Amerıkanyń qaryz aýyrtpalyǵy týraly esebin jarııalaǵan bolatyn. 30 jylǵa jasalǵan boljamda aıtylǵandaı, shara qoldanylmaǵan jaǵdaıda, kóp uzamaı qaryzdar jańa maksımýmǵa jetip, AQSh ekonomıkasyna qaýip tóndirýi yqtımal.

Jaýapty federaldy bıýdjet komıtetiniń prezıdenti Maııa Makgınestiń sózinshe, amerıkalyqtar sońǵy 18 aıda ınflıatsııanyń 40 jylda jetken eń joǵary deńgeıniń kýási boldy.

Loıola Merımaýnt ýnıversıtetiniń ekonomıka professory Son Von Son: «Bul elge óziniń alǵashqy 1 trln dollar úkimettik qaryzyn jınaý úshin 200 jyl qajet boldy. Al pandemııadan keıin qaryzdy ár toqsan saıyn taǵy 1 trln dollarǵa arttyryp kelemiz», - dedi.

Foto: Global Look Press