AQSh-tyń Memlekettik hatshysy Reseıge salynǵan sanktsııalar Qazaqstanǵa qalaı áser etetinin aıtty

ASTANA. QazAqparat – «S5+1» formatyndaǵy mınıstrler kezdesýinen keıin BAQ ókilderiniń saýalyna jaýap bergen AQSh-tyń Memlekettik hatshysy Entonı Blınken Reseıge qarsy salynǵan sanktsııalar Qazaqstanǵa qalaı áser etetinin aıtty, dep habarlaıdy QazAqparat tilshisi.

«Árıne, biz elderge salynǵan sanktsııalardyń saldaryn kórip otyrmyz. Degenmen biz ózgeniń esebinen sanktsııa zardabyn tartyp jatqan elderdiń kásiporyndary men kompanııalaryna arnaıy lıtsenzııalar beremiz. Biz jańa logıstıkatyq múmkindikterdi, eksporttyq naryqtardy izdeımiz. Biz Ortalyq Azııa elderine jańa seriktester men jańa múmkindikter ashý jolynda bar kúshimizdi salamyz. Sonymen qatar, seriktes memlekettermen jumys isteımiz jáne jańa saýda áleýetin damytý úshin «S5+1» formatyna qatysýshy elderge qoldaý kórsetemiz», - dep toqtaldy AQSh-tyń Memlekettik hatshysy Entonı Blınken.

Sonymen qatar baspasóz brıfıngine Entonı Blınken álemdik máselelerdi sheshýde Qazaqstannyń ózindik erekshe orny bar ekenin atap ótti.

Osyǵan deıin AQSh Memlekettik hatshysy Entonı Blınken Qazaqstanǵa alǵash ret keletinin habarlaǵan edik.

AQSh ókili Qazaqstanǵa kelisimen QR Syrtqy ister mınıstri Muhtar Tileýberdimen kezdesti.

Búgin Prezıdent Qasym-Jomart Toqaev AQSh-tyń Memlekettik hatshysy Entonı Blınkendi qabyldady.