AQSh-tyń Florıda shtatynan Jeńistiń 70 jyldyǵyna uıymdastyrylǵan avtosherý jolǵa shyqty

ASTANA. QazAqparat - Fashıstik Germanııamen soǵystaǵy Jeńistiń jáne keńestik jáne amerıkandyq áskerlerdiń Elbada kezdesýiniń 70 jyldyǵyna arnalǵan avtosherý AQSh-tyń Florıda shtatynan senbi kúni jolǵa shyqty, dep habarlaıdy TASS.

Vashıngtonǵa jol tartatyn bul sherýdiń maqsaty - Ekinshi dúnıejúzilik soǵys kezindegi KSRO-nyń fashıstik Germanııany jeńýiniń tarıhı rólin keńinen nasıhattaý.

Avtosherý Neıpl qalasyndaǵy «Bostandyq alańynan» bastaldy. Onyń quramynda ázirge 12 adam, 4 jeńil kólik, avtobýs pen júk kóligi bar, sherýge jolda taǵy da kóptegen adamdar men kólikter qosylmaq.

Avtosherýdiń alǵashqy kúni Gollıvýd qalasyna toqtap, fotokórme men shaǵyn kontsert uıymdastyrý josparlanyp otyr. Odan soń olar Vest Palm-Bıch men Kıssımı qalalarynda aıaldap, Orlandoǵa jol tartady.

7 kún ishinde avtosherý Djordjııa, Ońtústik jáne Soltústik Karolına, Vırdjınııa (Neıpls-Maıamı-Orlando-Sankt-Peterbor-Tallahassı-Atlanta-Vashıngton baǵytymen) 3,2 myń shaqyrymdy baǵyndyrmaq.

Al 24 sáýirde sherýshiler AQSh astanasyndaǵy Arlıngton ulttyq zıratynda "Elba rýhy" (Spirit of the Elbe) estelik plıtasyna gúl shoqtaryn qoıý saltanatyna qatysady.