AQSh-tyń barlaý qyzmeti koronavırýstyń qalaı shyqqany týraly ortaq sheshimge kele almady

NUR-SULTAN. QazAqparat – AQSh-tyń barlaý qyzmeti seısenbi kúni prezıdent Djo Baıdenge koronavırýstyń qaıdan shyqqany týraly baıandama jasady, alaıda onda vırýstyń zerthanada jasaldy ma, álde tabıǵı jolmen paıda boldy ma degen máselede ortaq sheshim aıtylmaǵan. Bul týraly QazAqparat TASS agenttigine silteme jasap habarlaıdy.

The Washington Post basylymy AQSh úkimetiniń eki ókiliniń pikirine júginedi. Olardyń aıtýynsha, arnaıy barlaý qyzmetteri birneshe kúnniń ishinde qujatty jarııalaý úshin onyń qupııa málimetteri alynyp tastalǵan nusqasyn ázirleýi tıis bolǵan. Ókilderdiń málimeti boıynsha, baıandamada aqparattyń kóp bolǵanyna qaramastan, vırýstyń naqty shyǵý tegi týraly sońǵy qorytyndy joq.

Bılik ókilderiniń biri amerıkandyq barlaý qaýymdastyǵy «bul máseleni qarastyrý úshin arnaıy jabdyqtalmaǵan», sebebi koronavırýstyń shyǵý tegin anyqtaý birinshi kezekte barlaýshy emes, ǵalymdardyń quzyretinde.

Dúısenbi kúni Aq úıdiń baspasóz hatshysy Djen Psakı koronavırýstyń shyǵý tegi týraly baıandamanyń qupııa emes nusqasy jurtshylyq nazaryna Baıden oqyp shyqqan soń birneshe kún ótkennen keıin usynylýy tıis dep málimdedi. Ol bul nusqanyń dál qandaı úlgide usynylatynyn naqty aıta almady.

Baıden mamyr sońynda AQSh-tyń barlaý qyzmetiniń jańa koronavırýstyń dál qandaı jolmen tarala bastaǵany týraly senimdi aqparaty joq ekenin málimdedi. AQSh prezıdenti arnaıy qyzmetterge qolda bar barlyq málimetti zertteýge eki ese kóp kúsh jumsaı otyryp, 90 kúnnen keıin jańa esep berýdi tapsyrdy.