AQSh turǵyny «koronavırýs» lotereıasynan bir mln dollar utty

NUR-SULTAN. QazAqparat – AQSh-tyń Ogaıo shtatynda turatyn áıel koronavırýsqa qarsy vaktsına alǵandar arasynda oınatylǵan lotereıanyń jeńimpazy atandy. Ol bir mıllıon AQSh dollaryn utty, dep habarlaıdy QazAqparat Business Insider-ǵa silteme jasap.

Portaldyń málimetinshe, Tsıntsınnatı qalasyna jaqyn ornalasqan Sılvertonda turatyn Ebıgeıl Býgenske lotereıanyń alǵashqy jeńimpazy atansa, mektep oqýshysy, Englvýd turǵyny Djozf Kostello bolashaq oqýynyń tolyq tólemin utyp alǵan. Jeńimpazdyń ekeýi de kezdeısoq sandar generatory arqyly anyqtalǵanyn atap ótý kerek. Lotereıaǵa 2,7 mıllıonnan astam adam qatysqan.

Lotereıa erejesi boıynsha, eń bolmaǵanda bir ekpe alǵan adamdar qatysýshylar tizimine avtomatty túrde kiredi. Ekpe alǵandar arasynda mıllıon dollar apta saıyn 23 maýsymǵa deıin oınatylady. Jalpy alǵanda, on adam júlde alady: bes eresek jáne bes jasóspirim.