AQSh tórt jyl ishinde Aıǵa sapar shegýdi josparlap otyr

VAShINGTON. QazAqparat – AQSh prezıdenti Donald Tramp «Memlekettiń jaǵdaıy» dep atalatyn jyl saıynǵy joldaýy kezinde zań shyǵarýshylardy aldaǵy tórt jyl ishinde Aı betine ǵaryshkerlerdi jiberý baǵdarlamasyn tolyq qarjylandyrýǵa shaqyrdy, dep habarlaıdy QazAqparat.

«Men Aıdaǵy kelesi er adam men alǵashqy áıel – amerıkalyq astronavtar bolatynyna kepildik retinde Kongressten Artemis baǵdarlamasyn qarjylandyrýdy suraımyn. Bul Amerıkanyń Marsta óz týyn ornatýyna alǵashqy qadam bolmaq», - dep málimdedi AQSh prezıdenti.

2017 jyldyń jeltoqsan aıynda Tramp «Apollon-17» jobasynyń 45 jyldyǵynda Aıǵa astronavtardy jiberý týraly NASA bastamasyna qol qoıǵan bolatyn. Byltyr naýryz aıynda vıtse-prezıdent Maık Pens agenttikke 2024 jylǵa deıin ýaqyt berdi. Burynyraq agenttik Aı betine 2028 jylǵa deıin qonýdy josparlaǵan bolatyn.

Mamyrda Aq úı Artemis degen atpen tanymal Aıdy zertteý bastamasyn qoldaý úshin NASA bıýdjetin 2020 jyly 1,6 mıllıard dollarǵa arttyrýǵa tyrysatynyn málimdedi. Nátıjesinde, agenttik Aıǵa adamdardy jiberý úshin 600 mıllıon dollar kóleminde qoldaýǵa ıe boldy.

Degenmen, The Verge basylymyna bergen suhbatynda NASA basshysy Djım Brıdenstaın baǵdarlamanyń jetistigi qarjylandyrýǵa baılanysty ekenin jetkizdi. Onyń aıtýynsha, 2021 jyldyń bıýdjeti odan da mańyzdyraq jáne ol 600 mıllıon dollardan da kóp bolýy kerek.