AQSh-taǵy orman órti 23 adamnyń ómirin qıyp ketti
15:35, 11 Qyrkúıek 2020
KALIFORNIıA. QazAqparat – AQSh-tyń batysyn sharpyǵan orman órti qurbandarynyń sany 23 adamǵa jetti. Bul týraly beısenbi kúni keshke USA Today gazeti jarııalady, dep habarlaıdy QazAqparat.
Basylymnyń habarlaýynsha, órt AQSh-tyń batysyndaǵy 12-den astam shtatty sharpyǵan. Kalıfornııada 19, Oregonda 3 jáne Vashıngton shtatynda 1 adam kóz jumǵan.
«Buryn-sońdy bolmaǵan qolaısyz aýa-raıy Kalıfornııada, Oregonda, Vashıngtonda jáne ózge de shtattardaǵy orman órtiniń tótenshe jaǵdaıyna ákeldi», - dep habarlaıdy Aıdaho shtatynda ornalasqan Ulttyq vedomstvoaralyq órt ortalyǵy.
Beısenbi kúni Oregon bıligi órt saldarynan shtattyń 500 myńnan astam turǵyny evakýatsııalanǵanyn málim etti.
Ulttyq vedomstvoaralyq órt sóndirý ortalyǵynyń qyzmetkerleri eldiń batysyndaǵy órt saldarynan 3,4 mıllıon akr (1,375 mıllıon gektar) jer órtenip ketkenin habarlady.