AQSh-taǵy qorlar málimetterine oraı munaı baǵasy belsendi ósýde

ASTANA. QazAqparat - AQSh Energetıka mınıstrliginiń eldegi «qara altynnyń» aptalyq qory jónindegi statıstıkalyq málimetteri shyqqan boıda, sársenbi kúni munaıdyń álemdik baǵasy ósýin jalǵastyrdy, buǵan saýda-sattyq qorytyndylary dálel.

Máskeý ýaqytymen saǵat 19:33-tegi jaǵdaı boıynsha, soltústikteńizdik Brent markaly munaı qospasyna tamyz aıyndaǵy fıýchersterdiń quny 1,89%-ǵa - barreline 52,41 dollarǵa deıin ósti.  WTI markaly munaıdyń shilde aıyna fıýchersteriniń baǵasy 1,61%-ǵa - barreline 51,17 dollarǵa kóterildi, dep jazady RIA Novostı.

AQSh-ta munaıdyń kommertsııalyq baǵasy (strategııalyq rezervterdi alyp tastaǵanda) 3 maýsymda aıaqtalǵan apta ishinde 3,2 mıllıon barrelge tómendedi, nemese 0,6%-ǵa - 532,5 mıllıon barrelge azaıdy. Taldamashylar apta ishinde qorlar 2,74 mıllıon barrelge - 532,96 mıllıon barrelge deıin azaıady degep paıymdaǵan bolatyn.

Eldegi iri Kýshıng termınalynda munaı qory 1,3 mıllıon barrelge deıin azaıdy. Al benzın qorlary AQSh-ta 1 mıllıon barrelge deıin ulǵaıdy.  

«Benzın qorynyń ósýi tosyn jaǵdaı boldy, óıtkeni ony tutyný maýsymy bastalǵan bolatyn», - dep túsindirme jasady Reıter agenttigine Nıý-Iorktegi Tyche Capital Advisors basqarýshy áriptesi Tarıhk Zahır.