AQSh-ta jyl saıyn aptap ystyqtan 1500-deı adam óledi

NUR-SULTAN. QazAqparat – Quqyqqorǵaýshylardyń málimeti boıynsha, AQSh-ta aptap ystyq saldarynan jyl saıyn 1500-deı adam kóz jumady. Sonyń jartysyna jýyǵy úı-kúısiz adamdar, dep habarlaıdy QazAqparat NBC News basylymyna silteme jasap.

Bıyl maýsym aıynyń basynda bastalǵan aptap ystyq aýa temperatýrasyn Tselsııa boıynsha 45,5 gradýsqa deıin kótergen edi. Ótken jyly bul kórsetkish 47,7 gradýsqa jetken bolatyn.

2021 jyly tek Arızona shtatynyń ózinde ystyqtan 339 adam kóz jumǵan, sonyń 130-y úı-kúısiz qańǵybas adam edi.

Al, Oregon shtatynda zańdy tulǵalar alǵash ret 24 saǵat salqyndatylyp turatyn ortalyqtar asha bastaǵan.

Portlend qalasynyń mańynda qańǵybas adamdardyń lagerlerine sý men balmuzdaq taratýǵa eriktiler komandalary tartylǵan. Bostonda bolsa, túrli aýdandardy ystyqtan qorǵaý tásilderi zerttelip jatyr. Shilińgir ystyqtan qorǵaný úshin aǵash sanyn kóbeıtip, kóleńke túsiretin túrli qurylymdar ornatý, shatyr jabyndysyna ystyqty az bóletin materıaldar qoldaný strategııalary qaralýda.

Kolýmbııa klımat mektebiniń baǵalaýynsha, kúnniń qatty ysýy búgingi tańda AQSh-tyń ǵana emes, Jer sharynyń shırek bóligine tónip turǵan másele. Osy beldeýdegi elderdiń ishinde Qazaqstan da bar.