AQSh-ta jolaýshylar ushaǵyna naızaǵaı soqty

VAShINGTON. QazAqparat - American Eagle áýe kompanııasynyń Embraer E175 ushaǵy Arkanzas shtatyndaǵy daýyl kezinde jerge qona salysymen oǵan naızaǵaı soqty, dep habarlaıdy QazAqparat Daily Mail basylymyna silteme jasap.

Kadrlardan vıdeo avtorynyń buǵan deıin ushaqtyń artqy bóligine de elektr razrıady túskenin aıtyp jatqanyn kórýge bolady.

Jolaýshylar birden ushaqtan shyǵarylyp, tekseris júrgizý úshin oqıǵa ornyna tehnıkalyq mamandar keldi.

Agenttiktiń habarlaýynsha, bul naızaǵaıdyń ushaqqa birinshi ret túsýi emes. Buǵan deıin Boeing 737 MAX shamamen 30 000 fýt bıiktikte ushyp bara jatqanda elektr razrıady tıip, Panama-Sıtıdegi Tokýmen halyqaralyq áýejaıyna qonǵan.

Esterińizge sala keteıik, mamyr aıynda qazaqstandyq FlyArystan áýe kompanııasynyń ushaǵyna da naızaǵaı túsken bolatyn. Ushaq shuǵyl túrde qondy.