AQSh-ta jolaýshylar poıyzy men júk kóligi soqtyǵysyp 3 adam qaza tapty
15:12, 28 Maýsym 2022
NUR-SULTAN. QazAqparat - AQSh-tyń Mıssýrı shtatynda jolaýshylar poıyzy men júk kóliginiń soqtyǵysýy saldarynan úsh adam qaza taýyp, ondaǵan adam jaraqat aldy, dep habarlaıdy QazAqparat BBC News-ke silteme jasap.
Amerıkanyń «Amtrak» ulttyq temirjol operatorynyń habarlaýynsha, Los-Andjelesten Chıkagoǵa baǵyt alǵan «Southwest Chief» jolaýshylar poıyzy Mendon mańyndaǵy temirjol ótkelinde júk kóligine soǵylǵan.
Oqıǵa saldarynan 7 vagon men 2 lokomotıv relsten shyǵyp ketken. Jol-patrýldik polıtsııa qyzmetkerleri soqtyǵystyń saldarynan poıyzdaǵy eki adam, júk kóliginde bir adam qaza tapqanyn rastady. Poıyzdaǵy 243 jolaýshy men 12 ekıpaj múshesiniń kem degende 50-i jaraqat alǵan. Buǵan deıin poıyzdardyń relsten shyǵyp ketýine baılanysty jol-kólik oqıǵalary Iran, Qytaı jáne Germanııada tirkelgen.