AQSh-ta ótetin Indıan-Ýells masters týrnıriniń jerebesi tartyldy

ASTANA. QazAqparat – AQSh-ta erler jáne áıelder arasynda 9 naýryzda bastalatyn Indıan-Ýells masters týrnıriniń jerebesi tartyldy, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, elimizdiń birinshi, álemniń 10-raketkasy Elena Rybakına jarysty ekinshi aınalymnan bastaıdy.

Elena bastapqy kezdesýin qos amerıkalyq Sloan Stıvens – Sofıa Kenınniń qaı jeńgenimen ótkizedi.

Álemniń 42-raketkasy ıÝlııa Pýtıntseva alǵashqy aınalymda dúnıejúzilik reıtıngte 76-orynda turǵan chehııalyq Karolına Mýhovamen kezdesedi.

Juptyq synda Qazaqstan namysyn Anna Danılına qorǵaıdy.

Erler arasyndaǵy Indıan-Ýells dodasynda Qazaqstannyń birinshi, álemniń 46-raketkasy Aleksandr Býblıktiń qarsylasy keıin anyqtalady. Ol irikteý saıysy jeńimpazdarynyń birimen oınaıdy.

Eske sala keteıik, budan buryn Astanadaǵy jarystyń irikteý satysynda bes qazaqstandyq tennısshiniń baq synaıtynyn jazǵan bolatynbyz.

Sondaı-aq qazaqstandyq tennısshilerdiń álemdik reıtıngtegi oryndary anyqtaldy.

Astanadaǵy týrnır qazaqstandyq tennısshiler úshin sátsiz bastaldy.